Баянзүрх дүүргийн 42 дугаар хороо, Цагаанхуаран болон Нарт хотхон орчимд борооны ус зайлуулах шугам угсралтын ажил үргэлжилж байна. Өнөөдрийн байдлаар ажил 40 хувийн гүйцэтгэлтэй байгаа бөгөөд есдүгээр сарын дунд гэхэд дуусгахаар төлөвлөжээ.

Шугамын ажлаар 600 мм-ийн төмөр бетон 232 метр хоолой угсралтыг эхлүүлсэн. Ажил дууссанаар автозам дээр ус тогтохгүй болж, иргэд аюулгүй зорчих нөхцөл бүрдэнэ гэж Геодези, усны барилга, байгууламжийн газрын албаны дарга Д.Ариунбаатар хэллээ. 

Баянгол дүүргийн 4 дүгээр хороо, Вокзал орчимд мөн ус зайлуулах шугам угсралтын ажил үргэлжилж байна. Нийтдээ 1566 метр урттай шугам барина. Өнөөдрийн байдлаар 55 хувийн гүйцэтгэлтэй байгаа талаар ГУББГ-ын Засвар, ашиглалтын албаны дарга Ж.Батдорж мэдээллээ.

Түүний хэлснээр, өмнө нь Вокзал орчимд ус тогтож, явган болон авто хөдөлгөөнд хүндрэл учруулдаг байсан. Шугам угсралтын ажил бүрэн дуусвал уг асуудал шийдэгдэнэ гэв.

ГУББГ-аас энэ онд нийслэлийн хэмжээнд 17 байршилд үерийн хамгаалалтын далан барьж, 10-15 байршилд нийт 15.6 км урт борооны ус зайлуулах шугам шинээр угсрахаар төлөвлөсөн байна. Өнөөдрийн байдлаар нийт ажлын гүйцэтгэл 60-70 хувьтай үргэлжилж байгаа бөгөөд ашиглаж буй хоолойнууд 600-1000 мм-ийн төмөр бетоноор хийгдэж, аравдугаар сард бүрэн дуусахаар төлөвлөгджээ.