Үндсэн хуулийн цэцийн Их суудлын хуралдааны шийдвэрийг танилцуулсны дараа ЗГХЭГ-ын дарга, Ерөнхий сайдын итгэмжлэгдсэн төлөөлөгч С.Бямбацогтын байр суурийг сонслоо. 

Тэрбээр, Монгол Улсын Ерөнхий сайд Үндсэн хуулийн цэцэд хүсэлт гаргасан. Хүсэлтийг Үндсэн хуулийн цэц хүлээн авч, онц хүндрэлтэй нэн яаралтай асуудал учир шуурхай шийдвэрлэлээ. Ерөнхий сайдын гаргасан хүсэлт шаардлага бүрэн хангагдаж байна. Монгол Улсад үнэн яллаа, Үндсэн хууль яллаа. Үндсэн хуулийн эрх зүйт төртэй улс гэдгээ нотлон харуулж чадлаа. 

Хуулийн хулгай хийж болдоггүй юм гэдгийг харуулсан шийдвэр гарлаа гэж бодож байна. Үндсэн хуулийн Их суудлын хуралдааны шийдвэр эцсийнх байна гэж Үндсэн хуульд тусгасан. Тиймээс цэцийн шийдвэрийг УИХ-аар авч хэлэлцэх боломжгүй гэсэн үг. Хэрэв Дунд суудлын хуралдааны шийдвэр байсан бол УИХ-аар хэлэлцэх заалт бий. 

-УИХ-ын гишүүдэд Ерөнхий сайдыг огцруулах санал гаргах эрх нь байгаа шүү дээ?
-Нээлттэй. Хамгийн гол нь хуулийг хулгайлж, зорилгодоо хүрэхийн тулд УИХ-ын гишүүд хэсэг бүлгээрээ нийлбэл юу ч хийж болно гэдгээ болих ёстой. Үндсэн хуульд захирагдаж, Үндсэн хуулийг дээдлэн сахина гэж УИХ-ын гишүүд тангараг өргөсөн. Гэтэл өнөөдөр Үндсэн хууль хамаагүй, ямар нэг байдлаар зорилгодоо хүрнэ гэсэн бусармаг байдлаар хандаж байгаад Үндсэн хуулийн цэц дүгнэлтээ гаргалаа. 

Засгийн газрыг огцруулах асуудлыг Үндсэн хуульд заасан үндэслэлээр тавих нь хэзээд нээлттэй. Энд сандал ширээтэй зууралдсан зүйл огт байхгүй гэв.