Монгол орны хулан нь дэлхий хэмжээнд тоо толгой болон тархац нутаг нь ховордож буй зүйл юм.  Энэ зүйлийн популяцийн 80 гаруй хувь Өмнийн говьд тархаж байна. 

Өмнөговь аймаг хуланг хамгаалах, тогтвортой менежментийг хэрэгжүүлэх зорилгоор “Хулан хамгаалал, менежментийн төлөвлөгөө”-г боловсруулж, аймгийн ИТХ-аар батлуулан хэрэгжүүлж эхэлжээ.

Төлөвлөгөөний хүрээнд хулангийн тархац нутаг, шилжилт хөдөлгөөнийг хамгаалах, амьдрах орчны доройтлыг бууруулах, уул уурхай болон дэд бүтцийн нөлөөллийг зохицуулах, орон нутгийн иргэдийн оролцоонд тулгуурласан хамгааллын арга хэмжээг хэрэгжүүлэхэд анхаарах аж.

Хулангийн талаарх баримтууд:

Хулан нь Монгол орны цөлжүү хээрийн сөөгт хөндий, нам аараг, толгод, уудам хотгор, хоолой, сайр садарга, талбиу дэнжээр бэлчээрлэдэг.

Ороо нийллэг нь долоодугаар сараас наймдугаар сарын эцэс хүртэл үргэлжилнэ. Гүү тавдугаар сарын дунд үеэс долоодугаар сарын эх хүртэл төллөж, нэг унага төрүүлнэ. Хээлээ 340-342 орчим хоногт тээнэ. Байдас 3-4 настай, харин үрээ 4-5 нас хүрч үржилд ордог. 

Зун өглөө, орой, шөнийн цагаар, сэрүүн улиралд бараг өдрийн турш бэлчээрлэнэ. Ус, бэлчээр хомс үед, эсвэл сэрүүн хүйтэн улиралд олон хулангийн сүрэг нэгдэж, хэдэн зуун бодьгалтай том сүрэг бүрэлдэнэ. 

Азарга байх идэвхтэй нас нь 5-10 юм. Байгалийн нөхцөлд 14 хүртэл жил насалдаг. 

Монгол хулан хул хонгор зүстэй, улирал болон бодгалиас хамаарч ухаа хонгор, цайвар хул, бор хул зүстэй ч тохиолдоно. Хуланг толгойн ясаар нь тахь адуунаас хялбар ялгах гол шинж нь түүний дээд эрүү завсарын ясны нийлэх хэсэгт байрлах товгор юм.

Эх сурвалж: Өмнөговь аймгийн БОГ, Байгаль апп