Сэлбэ голын урсцыг тогтворжуулах, үерийн эрсдэлээс сэргийлэх зорилгоор үерийн хамгаалалтын түшиц хана, голын голдирол тохируулга, тохижилтын ажлыг цогцоор нь гүйцэтгэхээр төлөвлөсөн. 

Голдирол тохируулгын ажил 60 гаруй хувьтай буюу 700 метр газар тохируулга хийж байгаагаас 400 метр газарт ажлыг дуусжээ. Баруун, зүүн талдаа гурван метр чулуун бэхэлгээ, голдирол дотроо 50 см зузаантай чулуун бэхэлгээ хийж байгаа юм.

“Билгүүн Монгол констракшн” ХХК-ийн менежер Р.Дамба “Чулуун бэхэлгээ хийж, голын урсцыг сайжруулснаар лаг хагшаас тогтохгүй, гол тунгалаг урсахад үр нөлөөтэй. Мөн голын суурь хөрсийг хамгаална. Түшиц хананы бат бөх байдлыг бэхжүүлнэ” гэдгийг тодотголоо.

Үндэсний үйлдвэрийн бэлтгэсэн боржин чулуугаар хийж байгаа бөгөөд тохируулгын ажил дуусмагц голын урсцыг нээх аж.

Үерийн хамгаалалтын түшиц хана барих ажил 95 хувьтай үргэлжилж байсан ч долоон байршилд шугам сүлжээ шилжүүлэх болсон тул түр хугацаанд хүлээгдэл үүссэн талаар “Билгүүн Монгол констракшн” ХХК-ийн менежер Р.Дамба хэллээ.

Тодруулбал, “Шангри-Ла”, “Сэнтрал Тауэр”, “Юнион Бюлдинг”-д тус бүр хоёр цахилгааны кабель шугам, Ус сувгийн удирдах газрын нэг кабелийг төрийн айлчлалтай холбоотойгоор түр хугацаанд салган залгах боломжгүй болсон. Салган залгалт хийх эрх үүсэж, шугам сүлжээний ажлыг дуусмагц түшиц ханыг гүйцээнэ.

Голын голдирол тохируулах, чулуун бэхэлгээний ажлыг ирэх сарын дундуур дуусгана. Мөн эргээ дагасан, хоёр талдаа 2 метр 50 см өргөнтэй явган хүний зам барих юм.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС