Монгол Улсын Ерөнхий сайд Н.Учрал Цөлжилттэй тэмцэх тухай НҮБ-ын конвенцын Гүйцэтгэх нарийн бичгийн дарга Ясмин Фуадыг хүлээн авч уулзлаа.

Уулзалтын үеэр Монгол Улсад наймдугаар сарын 17-ноос эхэлсэн Цөлжилттэй тэмцэх тухай НҮБ-ын конвенцын Талуудын 17 дугаар бага хурлын эхний өдрүүдийн явцын талаар дүгнэж, санал солилцов.

Монгол Улс 2026 оныг “Олон улсын бэлчээр ба нүүдлийн мал аж ахуй эрхлэгчдийн жил” болгон тэмдэглэж байгаа бөгөөд энэ хүрээнд COP17 олон улсын бага хурлыг эх орондоо зохион байгуулж байна. Тус хурлыг бэлчээр, малчдын асуудлаар олон улсын түвшинд бодлогын манлайлал үзүүлж, санхүүжилт, хөрөнгө оруулалт татах боломж хэмээн Монголын тал онцолжээ.

Энэ удаагийн хурлаар Монгол Улс “Тал хээрийн төлөвлөгөө”, “Нарлаг Монголын малчин” зэрэг хөтөлбөрөө олон улсад танилцуулж, бэлчээрийн доройтол, малчдын амьжиргаатай холбоотой асуудлыг олон улсын түвшинд дэвшүүлэн, санхүүжилт татах чиглэлээр ажиллаж байна.

23 улсад хэрэгжүүлэх 60 гаруй төсөлд нийт 1.29 тэрбум ам.долларын хөрөнгө оруулалт босгохоор тохиролцсон талаар Ясмин Фуад Ерөнхий сайд Н.Учралд мэдээллээ.

Энэ хүрээнд хөрс, бэлчээрийн доройтол, гангийн асуудлаар 170 гаруй улсын төлөөлөгч, хувийн хэвшил, олон улсын байгууллагууд хэлэлцэж, таван тивийн 23 улсад хэрэгжүүлэх 60 гаруй төсөлд нийт 1.29 тэрбум ам.долларын хөрөнгө оруулалт босгохоор тохиролцсон талаар Ясмин Фуад Ерөнхий сайд Н.Учралд мэдээллээ.

Уулзалтын үеэр Монгол Улс “Нарлаг Монголын малчин” хөтөлбөрийг COP17-ын “Эх байгалиа сэргээе. Итгэл найдвараа бадраая” үзэл санаатай уялдуулан үндэсний түвшний жишиг хөтөлбөр болгон хэрэгжүүлэхээр тогтов. Тус хөтөлбөрийг Цөлжилттэй тэмцэх тухай НҮБ-ын конвенцын Нарийн бичгийн дарга нарын газар болон олон улсын бусад түншүүдтэй хамтран хэрэгжүүлэхээр санал нэгдсэн байна.

Мөн Ясмин Фуад COP17-ын зохион байгуулалт өндөр түвшинд байгааг онцолж, Монгол Улс тус хурлыг эх орондоо зохион байгуулахад өндөр ач холбогдол өгч байгаад олон улсын хамтын нийгэмлэг талархаж буйг илэрхийллээ.

Эх сурвалж: Монгол Улсын Засгийн Газар