Баянзүрх дүүргийн 26 дугаар хорооны нутаг дэвсгэрт хоёр жилийн өмнө гарсан газын дэлбэрэлтэд өртөж, ашиглалтын шаардлага хангахгүй болсон 13 давхар 207 дугаар байрыг өнөөдөр бүрэн буулгаж дуусгажээ. 

Барилгыг буулгах ажлыг энэ оны есдүгээр сараас эхлүүлж 115 өдрийн хугацаанд буюу гэрээнд заасан хугацаандаа багтан барилгыг нураасан. Тус барилгыг буулгах тендерийг 4 удаа зарласан боловч шаардлага хангах аж ахуйн нэгж ирээгүй тул “Барилгын хог хаягдлыг дахин боловсруулах үйлдвэр” ОНӨААТҮГ гүйцэтгэсэн байна.

Энэ хугацаанд буулгалтын ажлыг 80 болон 50 тонны хоёр кран, дөрвөн бага оврын экскаватор, 30 тонны нэг ковш, найман хово машинтайгаар 20-25 хүний бүрэлдэхүүнтэй бригад гүйцэтгэв. Барилга буулгалтаас нийт 9800 тонн хүнд хог бууж, 520 удаагийн рейсээр хог тээвэрлэжээ.

Хотын дарга Х.Нямбаатар, "НИТХ-аар 2026 оны төсвийг батлахдаа 207 дугаар байрыг шинээр барих төсвийг шийдсэн. Ирэх долоо хоногт гүйцэтгэгчийг сонгох тендерийг зарлана. Бид газын дэлбэрэлтийн буруутай этгээдээр буулгалтын зардлыг гаргуулахаар бэлтгэж байна.

Дэлбэрэлт барилгын хийцэд нөлөөлөл үзүүлсэн гэж шинжээчид дүгнэсэн. Бид тус барилгыг нураалгүйгээр хүчитгэх талаар удаа дараа ярилцсан ч ингэх боломжгүй байсан” гэв. 

Буулгалтаас гарсан бетон, арматурыг Морингийн даваа дахь үйлдвэрт дахин боловсруулах аж.

207 дугаар байрын оршин суугч “Бид гэр орондоо буцаж орохыг их хүсэж байна. Өнөөдрийг хүртэл биднийг орхиогүй нийслэлийн удирдлагууд болон холбогдох албаныханд баярлалаа. Одоогоос хоёр жилийн өмнө бид орон гэргүй болсон. Төр 63 өрхийн 220 иргэнийг гудманд гаргалгүй түрээсийн асуудлыг шийдэж ирсэн. Ингээд байрыг маань буулгаад дахин барьж өгөх гэж байгаад их талархаж байна” гэв.