Монголын багш нарын төлөөлөл цалингаа нэмүүлэхийг шаардаж есдүгээр сарын 24-нд төв талбайд жагссан. Тэд тус  жагсаалыг зохион байгуулснаар үр дүн гарахгүй бол ажил хаялт зарлахаа мэдэгдэж байсан юм.

Тэгвэл өнөөдрөөс буюу /2025.10.16/-ны 08.00 цагаас эхлэн улс орон даяар боловсролын байгууллагын ажилтнуудын цалин хөлсийг нэмэгдүүлэх шаардлагын дагуу хугацаагүй ажил хаялаа.

"ЭНЭ БОЛ ХУГАЦААГҮЙ АЖИЛ ХАЯЛТ"

Нийслэлийн ерөнхий боловсролын 21-р сургуулийн Хими, биологийн багш Г.Ганхуяг: БШУ-ны Үйлдвэрчний эвлэлийн холбоо болон Боловсролын яамны хамтын хэлэлцээрийн маргааны үндсэн дээр нийт багш, ажилчид өнөөдрөөс эхлэн ажил хаялтыг Монгол орон даяар зарлаж байна.

Монгол Улсын нийт албан хаагчдын дундаж цалингийн статистик мэдээгээр 2024 онд 2.2 сая, 2025 оны хоёрдугаар улиралд 2.5 сая гэж мэдээлсэн.

Гэтэл ЕБ-ын дунд сургуулийн багш нарын үндсэн цалин 1 сая 480 мянга, цэцэрлэгийн багш нарынх 1 сая 595 мянган төгрөг байна. Энэ нь статистик үзүүлэлтээс сая төгрөгөөр дутуу олгогдож байна. Ийм учраас боловсролын салбарт ажиллаж буй багш нарын амьдрах нөхцөл хүнд, шударга бус байна.

Өөрөөр хэлбэл, Боловсролын Яам болон БШУ-ны Үйлдвэрчний эвлэлийн хамтын хэлэлцээрт "жил бүр 30 хувиар цалин нэмнэ" гэсэн заалтыг зөрчсөн учраас маргаан үүсэж, албан ёсоор ажил хаялт явагдаж байна. Иймд ажил хаялтын үндсэн зарчмыг ойлгож байгаа гэдэгт итгэж байна.

Энэ бол хугацаагүй ажил хаялт. Хэрэв хоёр тал зөвшилцөн, харилцан гарын үсэг зурсан тохиолдолд ажил хаялт албан ёсоор зогсох болно.

Иймд хуулийн дагуу ажил хаялтыг зохион байгуулах хэсгийг таван бүрэлдэхүүнтэй буюу Үйлдвэрчний эвлэлийн тэргүүлэгч 3, бага болоод дундын нийгмийн ажилтан гэсэн бүрэлдэхүүнтэй явуулж байна. Багш нар цалингаа нэмэгдүүлэхийн тулд тууштай тэмцэх болно" гэв.

БЗД-ийн 122-р цэцэрлэгийн Үйлдвэрчний эвлэлийн дарга Ц.Баялаг: Манай цэцэрлэгийн 45 багш ажил хаялтад оролцож байна. Бидний тавьж буй шаардлага бол цалингаа нэмэгдүүлэх. Учир нь багш нарын авч буй цалин амьдралд огт хүрэлцэхгүй нөхцөлд амьдарч, ажиллаж байна. Манайд 950 мянган төгрөгийн цалинтай багш нар ч бий. Тэд бүх татвараа төлөөд гар дээрээ ердөө 300 мянган төгрөгийн л цалин авч байна.

Өөрөөр хэлбэл, амьжиргаагаа залгуулахын тулд өрнөөс өрний хооронд зээл авч амьдарч байгаа нь өнөөгийн бодит нөхцөл байдал. Иймдээ ч цэцэрлэг, сургуулийн багш нар олон жил тэвчээртэйгээр хүлээлээ. Гэвч бидний хүссэн хэмжээнд хүрч чадахгүй байгаа учраас тэмцэл, хөдөлгөөнд оролцохоос өөр аргагүйд хүрлээ. Бидний шаардлагыг бүх эцэг эхчүүд дэмжиж, нааштай хүлээж авч байгаа.

Гэрэл зургийг: Г.Өнөболд