Японы мэргэжлийн сүмогийн 69 дэх Их аварга Хакүхо М.Даваажаргалын зодог тайлах, үсээ засуулах ёслол өнөөдөр Токио хот дахь Кокүгикан ордонд эхэлж байна.

Мэргэжлийн сүмо бөхийн башёд түрүүлсэн монгол бөхөд Монгол Улсын Засгийн газрын шийдвэрээр Батламж, Ерөнхий сайдын нэрэмжит шилжин явах цом гардуулдаг уламжлалтай.

Засгийн газрын энэ долоо хоногийн /2023.01.25/ ээлжит хуралдаанаар Японы мэргэжлийн сүмогийн 69 дэх их аварга Хакүхо М.Даваажаргалд Монгол Улсын Ерөнхий сайдын нэрэмжит цомыг үүрд хадгалуулахаар шийдвэрлэсэн юм.

Хакүхо М.Даваажаргал нь ёкозүна цолтойгоор тогтмол өндөр амжилт үзүүлж, сүмо бөхийн олон дээд амжилтыг тогтоож, монгол хүний бяр хүч, ур ухааныг олон улсад таниулахад оруулсан хувь нэмрийг нь ийнхүү Монгол Улсын Засгийн газар өндрөөр үнэлсэн билээ.



Зодог тайлах ёслолд оролцон Ерөнхий сайдын нэрэмжит шилжин явах цомыг гардуулахаар Монгол Улсын Засгийн газрыг төлөөлж Олимп, нийтийн биеийн тамир, спортын сайд Б.Бат-Эрдэнэ очжээ. Хакүхо аваргын зодог тайлах ёслол болж буй 8000 суудалтай Кокүгикан ордонд үзэгчдээр дүүрсэн харагдах агаад Монголоос улстөрчид, бөхчүүд, спорт сонирхогчид олноор очсон байна. 

Хакүхо М.Даваажаргал сүмо бөхийн хувиар дэвжээнд гарч залуу болон өсвөрийн сүмочидтой хүндэтгэлийн барилдаан хийж, сүмо сонирхогчдоо баярлуулав. Залуу сүмочдыг төлөөлж Монгол Улсын Далай аварга Г.Өсөхбаярын хүүтэй барилдсан бол өөрийн хүүтэй сүмо бөхийн дэвжээнээ сүүлчийн барилдаанаа хийхэд танхимд дүүрэн цугларсан үзэгчид баяр хүргэн хүндэтгэл үзүүлж буй хэсгийг Дархан аварга, Олимп, нийтийн биеийн тамир, спортын сайд Б.Бат-Эрдэнэ өөрийн фэйсбүүк хуудсаараа шууд дамжуулан үзүүлэв.