Нийгмийн эрүүл мэндийн үндэсний төвийн удирдлагын багийн хамт олон 21 аймгийг тойрон сургалт, уулзалт зохион байгуулахаар төлөвлөжээ.

Энэ төлөвлөгөөний эхлэл болгон өнгөрсөн сарын 24-29-ний өдрүүдэд Нийгмийн эрүүл мэндийн чадавхи бэхжүүлэх сургалтыг Булган, Орхон, Дархан-Уул аймагт зохион байгууллаа.

Нийгмийн эрүүл мэндийн чиглэлээр ажиллаж буй мэргэжилтэн, өрхийн эмч, сувилагч нийлсэн зуу гаруй мэргэжилтнүүдэд “Нийгмийн эрүүл мэндийн тусламж үйлчилгээний хүртээмж, чанар, үр дүнг сайжруулах нь” сэдвээр номын дуу сонсгожээ.

Энэ үеэр тухайн орон нутгийн онцлогоос хамаарсан орчны эрүүл мэнд, хоол хүнс, эрүүл мэндийг дэмжих чиглэлээрх тулгамдсан асуудлыг тодорхойлж, үйл ажиллагааны төлөвлөгөөг боловсруулсан нь сургалтын гол үр дүн байсан гэдгийг НЭМҮТ-өөс мэдээллээ.

Тус сургалтыг НЭМҮТ-ийн ерөнхий захирал, АУ-ны доктор Б.Цогтбаатар ахалж, Бодлогын хэрэгжилтийг зохицуулах хэлтсийн дарга С.Гантуяа, Хоол судлалын албаны дарга, АУ-ны доктор Ж.Батжаргал, Тархвар зүй, шуурхай удирдлагын албаны дарга Р.Даваадорж, Эрүүл мэндийг дэмжих, өвчлөхөөс урьдчилан сэргийлэх албаны дарга, АУ-ны доктор О.Нандин-Эрдэнэ, Хэвлэл мэдээлэл олон нийттэй харилцах ажилтан Х.Өнөрсайхан нар зохион байгуулжээ.

Энэ хүрээнд “Төрөөс эрүүл мэндийн талаар баримтлах бодлого”-д тусгагдсан НЭМ-ийн  асуудлууд, хэрэгжиж буй бодлого, хөтөлбөр, зорилтуудыг танилцуулан, хэрэгжүүлэх арга зүйгээр ханган, орон нутагт хэрэгжиж буй НЭМ-ийн тусламж үйлчилгээний хүртээмж, чанар, үр дүнгийн талаар мэдээлэл, туршлага солилцон,  орон нутагт НЭМ-ийн тулгамдаж буй асуудлууд, шийдвэрлэх арга замын талаар хэлэлцэн, үр дүнтэй санаачлага, интервенцийг эхлүүлэхэд туслахыг зорин ажиллажээ.