Засгийн газраас өнгөрөгч хоёр долоо хоногийн хугацаанд гаргасан төлөвлөгөөгөө танилцууллаа. Энэ төлөвлөгөөг хэрэгжүүлэхдээ УИХ, Монголбанкныхантай хамтран ажиллажээ.

Юун түрүүнд, түрүүчийн Засгийн газрын хэрэгжүүлсэн хүүхдийн 100 мянган төгрөг олгох үйл ажиллагааг үргэлжлүүлэн 2021 оны долдугаар сар хүртэл олгох болно гэдгээ илэрхийллээ. Мөн өрхүүдийн цахилгааны төлбөртэй нийлээд 1,7 их наяд төгрөгийг зарцуулахаар төлөвлөсөн байна.

Манай улсын төсвийн орлого ойролцоогоор 10 их наяд төгрөг гэхээр Засгийн газар багагүй ачаа үүрч байгааг гүйцэтгэх засгийн тэргүүн онцлов.

“Нэг өрх-Нэг шинжилгээ”: Энэ үйл ажиллагааны үр дүнд тархалтыг хумиж, дахин хөл хорио тогтоохгүй байхыг хичээх, зарлах боллоо гэхэд 14-21 хоногийн өмнө мэдээлж байж зарлах төлөвлөгөөтэй.

Математик тооцоолол дээр үндэслээд харвал одоогийн хөл хорионы дараа дахиад 1-2 удаа хөл хорио тавьж болзошгүй. Гэхдээ дээр хэлсэнчлэн урьдчилж хэлнэ. Ирээдүйг илүү тодорхой болгохын тулд ажиллана. 

Вакцинжуулалт: Ажлын хэсэг идэвхтэй ажиллаж байна. Бидний хувьд астразенека, пфизер вакцинуудыг оруулж ирэхийн тулд ажиллана. Монгол Улсын нутаг дэвсгэрт вакциныг хадгалах боломжийг бүрдүүлэхийн тулд хатуу хөл хорионы үед ажиллана. Нийт хүн амынхаа 60 орчим хувийг вакцинжуулахад эрсдэлээс сэргийлэх боломжтой гэдгийг ДЭМБ бидэнд анхааруулсан. Бид 60 хувийг тодорхой дарааллын дагуу хийнэ. 

1. Эрүүл мэндийн байгууллагынхан
2. Экспортын үйл ажиллагаанд оролцогчид
3. Өвчтэй болон ахмадууд
4. Суурь өвчтэй иргэд

Эхний ээлжинд 300 мянган тунг оруулж ирнэ. Зарим хувийн хэвшил вакцины чиглэлээр хамтран ажиллах хүсэлт ирүүлсэн. Энэ асуудлыг нээлттэй байлгахаар ажиллана. ОХУ, БНХАУ, Энэтхэг, Япон улсуудын Засгийн газарт талархаж байгаагаа илэрхийлье. 

Иргэдээс авсан ярилцлагаар УОК-ын шийдвэрүүд ойлгомжгүй байна гэсэн. Тиймээс цаашдаа 4 өнгөөр түвшинг ангилна. Аймаг, орон нутаг, хороолол, дүүргүүдэд дараах өнгийн тэмдэглэгээг хийнэ гэсэн үг. 

Ногоон өнгө буюу 1-р зэрэг ногоон бүс: Сануулга өгч,  мэдээлэх үе. Өвчний тархалтыг хумин тогтоосон.  Ногоон бүс буюу халдваргүй газрууд гэсэн үг. Гэхдээ гадаадаас зөөвөрлөгдөн орж ирэх эрсдэлтэй.

Шар өнгө буюу 2-р зэрэг. АНХААРУУЛАХ. Өдөр тутмын бэлэн байдлын зэрэг. Өвчний тархалтыг зогсоож байгаа ч олон нийтийн дунд тархах эрсдэлтэй. Өдөр тутмын бэлэн байдал буюу анхааруулах өнгө. Өрхийн гишүүдийн дундах халдварын тоо өсөж байгаа. Нэг эсвэл түүнээс олон хоорондоо хамааралгүй халдвар, кластер бүртгэгдсэн. 

Улбар шар өнгө буюу 3-р зэрэг: ХАТУУ АНХААРУУЛГА. Өндөржүүлсэн бэлэн байдлын зэрэг. Нийгмийн бүлэг тодорхой хүрээлэлд халдвар тархсан. Хэд хэдэн кластерт халдвар бүртгэгдсэн. 

Улаан өнгө буюу 4-р зэрэг: ШААРДАХ. Бүх нийтийн бэлэн байдлын зэрэг. Өвчний тархалт маш хурдтай үргэлжилж байгаа, халдвар бүх нийтийг хамарч, газар авсан. 

2021 оны хоёрдугаар сарын 11-нээс 4-р зэрэгт шилжиж байна гэсэн үг. 

Хэвлэл мэдээллийн хувьд төрөөс нэг хүнээр дамжиж мэдээлэл гарна. Хэвлэл мэдээллийн зөвлөлтэй хамтарч ажиллана. Emongol цонхонд өдөр тутмын халдварын мэдэлээлэл гарна.

Шар болон ногоон өнгөд шилжвэл Нийслэл болон аймгийн онцгой комисс хэсэгчилсэн зохион байгуулалтыг хийнэ.

Улаан өнгөнд шилжсэн тохиолдолд удирдлага Шадар сайдад 100 хувь шилжинэ. 

Хөл хорио дуусангуут буюу 23-ны өдөр бизнесийн үйл ажиллагааг хэрхэн зохион байгуулах талаарх шинэ дүрмийг танилцуулна. Бизнесийг шууд болон шууд бусаар харьцдаг гэж хоёр хуваана. Шууд харьцдаг гэдэгт жишээ нь үйлчилгээний байгууллага орно. Шууд бус байгууллагуудад мөн адил стандарт тавьж, ажиллах ажиллахгүйг болон хэрхэн ажиллахыг шийдвэрлэнэ. Түрүүнд нь 13-15 стандарт тавьдаг байсан нь ойлгомжгүй байсан. 

Цахимыг дэмжинэ. Цахимаар ажиллах бүх бодлогыг Засгийн газар дэмжинэ. Хүргэлтийн бизнесийг Засгийн газраас онцгой дэмжинэ. Төрийн үйлчилгээг цахимжуулах үйл ажиллагааг эрчимжүүлнэ.

Хилийн тусгай бүсийг байгуулна. Гадны бизнесийн уулзалтуудыг хийж болно. Онгоцны буудлын наана тусгай зориулалтын бүс байгуулна. Үүнийг ногоон бүс байдлаар зохион байгуулна. Бичиг баримт дээр гарын үсэг зурах, нотариатаар баталгаажуулах зэргийг зохион байгуулах боловч шууд уулзалтыг дэмжихгүй. 

Банкуудтай мөн цахимаар үйл ажиллагаа явуулах чиглэлд дэмжиж ажиллана. Бэлэн бус төлбөр тооцоог Засгийн газар бодлогоор дэмжиж ажиллана.

Гадаадад байгаа иргэдээ татан авна. Одоогоор 9135 иргэн гадаадаас эх орондоо ирэх хүсэлтээ өгсөн. Засгийн газар 100 хоногт багтаан 16 удаагийн нислэгээр 2560 иргэнээ татан авна. Ирсний дараа заавал 50 мянган төгрөгийн тусгаарлах байранд ор гэхгүйгээр халдвар хамгааллаа сайжруулсан зочид буудлуудад байршуулах боломжийг нээнэ. Зочид буудлуудад тусгаарлалтын бизнесийг нээж өгнө гэсэн үг. Тэгэхээр иргэд 50 мянган төгрөгийн зочид буудалд эсвэл 1000 долларын үнэтэй өрөөнд ч орох боломжийг нээнэ.

Гадагшаа зорчих зөвшөөрөлтэй, боломжтой иргэдээ зорчуулна.

Нислэгүүдийг 1-2 сарын өмнө зарлаж, шат дараатайгаар ердийн горимд шилжүүлнэ. 

Хамгийн их хохирол амсаж буй хүмүүс бол жижиг дунд бизнес эрхлэгчид. Ажлын байрны түрээс, зээлийн хүү хоёр том дарамт болж байна. Тиймээс дараах алхмуудыг хийнэ.

Зээлийн хүүг бууруулах: Хоёр их наяд төгрөгийг 3 хувийн хүүтэй, зээлийн хугацаа 3 жил, үндсэн төлбөрөөс чөлөөлөгдөх хугацаа нэг жил байхаар тооцож арилжааны банкуудаар дамжуулж зах зээл рүү нийлүүлэхээр боллоо. 

Энэ хоёр их наяд төгрөгийг хэрхэн босгох вэ. Хармагтайн ордын ТЭЗҮ шийдэгдсэн, үүнийг алтны урьдчилгаа байдлаар Монголбанктай ярилцаж 1 их наядыг нь, Засгийн газраас Монголбанкнаас 0 хувийн хүүтэй бонд худалдаж авч, арилжааны банкуудад зээлийн баталгаа гаргаж 1 их наядыг босгоно. 

Дээрх зээлийг арилжааны банкуудаар дамжуулж олгоно. Үүний тулд Төв банкны менежментийг өөрчилж дундаж орлоготой иргэдийг дэмжих хэлбэрт зохион байгуулна. Төрийн банк “Дундаж орлоготой иргэдийг дэмжих үндэсний тогтолцоо”-ны хүрээнд дээрх зээлийг олгож эхэлнэ гэсэн үг. 

Залуучуудын хөдөлмөр эрхлэлтийг дэмжихэд 500 тэрбум төгрөгийг зарцуулна. Үүнийг төсөв дотроо зохицуулалт хийх замаар гаргана. 

Түргэвчилсэн вакум сургалтад залуусыг хамруулах 1 сая төгрөгийн хоёр сарын хугацаатай тэтгэлэгт хөтөлбөрийг зарлана. Цахимаар ажилгүй болсон, ажлын байрны цомхотголд орсон залуусыг шат шатны ЗДТГ, и-монголиа, НХХЯ зэрэг газруудын цахимаар бүртгэнэ. Сар бүр 5000 залуусыг энэ хөтөлбөрт хамруулна. НХХЯ, БХЯ, БШУЯ хамтран ажиллана. Хагас цэрэгжсэн зохион байгуулалтад оруулж, илчлэг сайтай хоол ундаар хангаж, жолооны курс төгсөх боломжийг хангана. Аль нэгэн шаардлагатай мэргэжлээр сургана.

Төгсөхдөө нэг сая төгрөгийг гардаж, сертификат авна. Ингээд шууд хөдөлмөрийн биржид бүртгүүлж, томоохон бүтээн байгуулалтын ажилд ажиллах тэргүүн эгнээний зуучлалд орно гэсэн үг. Энэ залуусаас бүрдсэн ажлын байрыг гаргасан компаниудад татварын болон бусад урамшууллыг олгоно. Төвлөрлийг сааруулах бодлого явуулсан компаниудад урамшуулал олгоно.

ОРОН СУУЦЖУУЛАХ 3 ИХ НАЯДЫН ТӨЛӨВЛӨГӨӨ

Улаанбаатар хотын хэмжээнд 217 мянган өрх орон сууцны хэрэгцээгээ сайжруулах хүсэлтэй байна.

Орон сууцжуулах 3 их наядын төлөвлөгөөг эхэлнэ. Барилгын салбарт олон залуус ажилладаг. Илүү цэгцтэй төлөвлөгөөтэй амьдрахад залууст орон сууц хамгийн чухал. Тиймээс энэ хөтөлбөрт Засгийн газар онцгой анхаарал хандуулна. Үүний тулд:

• Төрөөс газрыг үнэгүй олгоно
• Төрөөс дэд бүтцийг бүрэн холбоно
• Нэг маягийн нэгдсэн зурагтай байлгана
• Ипотекийн зээлийг нийлүүлнэ

​1 их наяд нь нэгдсэн зургаар орон сууц барих, газар олгох, цемент арматур төмөртэй холбоотой асуудал, дэд бүтцийг төрөөс хариуцах, орон сууцны орчмын сургууль, цэцэрлэг зэргийг төр байгуулахад зарцуулна. Засгийн газрын тавьж байгаа стандартыг хүлээн зөвшөөрч, барилгын м2-ыг буулгаж чадвал ипотекийн санхүүжилтэд бид 2 их наядыг олгоно. 30 жилийн хугацаатай сар тутам 100 тэрбумыг олгоно. Шаардлагатай бол нэмэлт санхүүжилт олгоно. 

Цаашдаа 6 хувийг орон нутагт улам багасгах, хөдөө орон нутагт шилжиж очих тусам орон сууц илүү хямд болох буюу төвлөрлийг багасгах бодлого чиглэлд ажиллана.

ХОЁР ИХ НАЯДЫН ДАХИН САНХҮҮЖҮҮЛЭХ ТӨЛӨВЛӨГӨӨ

Монголбанкны дахин санхүүжүүлэх репо хөтөлбөрөөр томоохон бизнесүүдэд зээлийн хүүг бууруулна. Томоохон зээлүүдээ бизнесийн хувьд дахин төлөвлөх боломжийг өгөхийн тулд 16 хувийн хүүг 10,5 хувь болгож байна. 1 их наядыг 2 их наяд болгож, хугацааг 2 жил болгож, улирал тутамд олгох санхүүжилтийг 500 тэрбумд тогтооно.

Хувийн хэвшлийг дэмжиж, эдийн засгийн царцсан эргэлтийг сэргээх хэлцлийг Монголбанктай хийж чадлаа.

Цаашдаа бодлогын хүүг шат дараалан буулгах бодлого барина. Тиймээс 10,5 хувийн хүү буурах ч боломжтой.

ХӨДӨӨ АЖ АХУЙН ҮЙЛДВЭРЛЭЛИЙГ ДЭМЖИХ 500 ТЭРБУМЫН ЗЭЭЛ

Удахгүй хаврын тариалалт эхэлнэ. Өнгөрсөн оноос хойш ковидын сөрөг нөлөөнд хамгийн бага өртсөн салбаруудын нэг нь хөдөө аж ахуйн салбар байв. Энэ салбарыг дараах зээлүүдээр дэмжих бодлого баримтална. Зээлийн хүү нь 3 хувь байна.

• Хаврын тариалан эрхлэлтийн зээл- 100 тэрбум
• Нооуур бэлтгэлийн зээл- 200 тэрбум
• Малчдыг дэмжсэн зээл- 200 тэрбум
• Өрхийн тариалан зээл - 10,5 мянган тонн хүнсний ногооны үр 

СТРАТЕГИЙН АЧ ХОЛБОГДОЛТОЙ ТӨСЛҮҮД

Томоохон төсөл гэдэг бол ажлын байр, эдийн засгийн эргэлт гэдгийг Ерөнхий сайд оцноллоо. Иймээс томоохон төслүүдийг хөдөлгөх бөгөөд төр, хувийн хэвшлийн нягт түншлэлийг дэмжинэ. Алтанбулаг, Замын-Үүд боомтын шинэчлэл, Тавантолгойн цахилгаан станц, Байгалийн хий Эрдэнэбүрэнгийн цахилгаан станц, Газрын тос боловсруулах үйлдвэр, байгалийн хий дамжуулах хоолой, мөн бүтээн байгуулалтад зориулагдсан Эрдэнэс тавантолгой ХК-д бонд босгохтой холбоотой Богдхаан төмөр зам, Зүүнбаянгийн төмөр зам болон бусад санхүүжилтийг Засгийн газар 100 хоногтоо багтаан тендерийг эхлүүлнэ.

Түүнчлэн Засгийн газар төр болон хувийн хэвшлийн түншлэл дээр тулгуурлан 100 онцлох төсөл, арга хэмжээг хэрэгжүүлнэ гэдгийг Ерөнхий сайд хэллээ. Тодруулбал уул уурхай, хөдөө, аж ахуй, эрчим хүч, оюунлаг бизнес, аялал жуулчлал, тээвэр логистик гэсэн зургаан салбарт 100 төслийг Засгийн газрын 100 хоног дотор багтаж зарлана. Энэ нь уул уурхайгаас гадна эдийн засгийн тэргүүлэх чиглэлийг гаргаж ирэх зорилготой гэв.

"Ажлын байр нэмэгдүүлэхгүйгээр нэг удаагийн тэтгэмж өгсөн ч эдийн засаг хэвээрээ байх болно. Хамгийн сайн халамж бол баталгаатай ажлын байр. Тийм учраас ажлын байраа хамгаалах, хувийн хэвшлийг дэмжихэд энэхүү 10 их наядын төлөвлөгөөний гол амин сүнс оршиж байна. Үүн дээр иргэн таны оролцоо маш чухал. Нэг өрх-нэг шинжилгээ хүнд сонсогдож байгаа ч ийм арга хэмжээ авснаар бид ногоон, шар бүс рүү шилжинэ" гэдгийг Ерөнхий сайд Л.Оюун-Эрдэнэ хэллээ.