Монголбанкнаас 2025 оны 9 дүгээр сарын 30-ны өдөр ирүүлсэн “Төрөөс мөнгөний бодлогын талаар 2026 онд баримтлах үндсэн чиглэл батлах тухай” Улсын Их Хурлын тогтоолын төслийг хэлэлцлээ. Төрөөс мөнгөний бодлогын талаар 2026 онд баримтлах үндсэн чиглэлийн төслийн талаар Монголбанкны ерөнхийлөгч Б.Лхагвасүрэн танилцуулав. 

Манай улсын эдийн засаг харьцангуй тогтворжиж, оны эхний хагаст 5.6 хувиар өссөн байна. 

Өнгөрсөн өвөл тохиосон зудын нөлөө арилж, хөдөө аж ахуйн салбар оны эхний хагаст 35.6 хувиар өссөн нь нийт өсөлтийн талаас илүү хувийг бүрдүүлжээ. Төмөр зам, орон сууцны барилгын ажил идэвхжин, барилгын салбар 25.2 хувиар,  үйлчилгээний салбар 4.5 хувиар өссөн нь эдийн засгийн өсөлтөд эерэг нөлөө үзүүлсэн байна.

Монголбанкны төсөөллөөр энэ оны сүүлийн хагаст зэсийн олборлолт нэмэгдэх, шинэ төслүүдийн бүтээн байгуулалт эрчимжих зэрэг нь эдийн засгийн өсөлтийг дэмжих хүлээлттэй байна. Улмаар эдийн засгийн өсөлт  2025-2026 онд 5-6 хувьд тогтвортой өсөх хүлээлттэй байгаа аж.

Инфляц энэ оны 2-7 дугар сарын хооронд буурч, наймдугаар сард дотоодын хүнсний үнийн нөлөөгөөр бага хэмжээгээр нэмэгдсэн. 

Ирэх саруудад хүнсний үнийн нөлөөгөөр инфляц эрчимжиж болзошгүй. Цаашид алгуур буурч, 2026 онд зорилтот интервалд орох хүлээлттэй байгаа гэв. 

Түүнчлэн, төлөвлөсөн бүтээн байгуулалтуудыг гадаад эх үүсвэрээр санхүүжүүлэх шаардлага хэвээр байгааг тэмдэглээд “Дотоод эх үүсвэрээр санхүүжүүлэх нь эдийн засгийн гадаад, дотоод тэнцвэр алдагдах, төлбөрийн тэнцэл, төгрөгийн ханш, инфляцын дарамт нэмэгдэх эрсдэлтэй” гэв. 

Иймд инфляцын зорилтыг хангахад мөчлөг сөрсөн төсвийн бодлого хэрэгжүүлж, хүнсний барааны нийлүүлэлтийн доголдлыг технологийн шүүдлүүдийг ашиглан шуурхай шийдвэрлэхэд ахиц гаргахад анхаарах нь чухал хэмээсэн. 

Мөн, гол нэрийн барааны нийлүүлэлтийг тогтворжуулах нь үнийн савлагааг бууруулж, иргэд, үйлдвэрлэгч, хөрөнгө оруулагчдын бодит орлогыг хамгаалсан нам, тогтвортой түвшний инфляцын орчныг бүрдүүлэх суурь болохыг онцлов.

Нүүрсний экспортын орлого оны эхний 8 сард өмнөх жилийн мөн үеэс 2.7 тэрбум ам.доллар бага байна. Гадаад худалдааны эргэлт саарч, урсгал дансны алдагдал тэлж буй энэ үед Засгийн газар, банкууд болон хувийн секторын гадаад зээл, бондын эх үүсвэр гадаад валютын дотогшлох урсгалыг тэтгэж байгаа гэв.