Тэргүүн шадар сайд, Эдийн засаг, хөгжлийн сайд Н.Учрал \ Хөгжлийн банкны удирдлагуудтай уулзаж, үйл ажиллагааны зарчим, яаралтай хэрэгжүүлэх арга хэмжээ, хууль эрх зүйн шинэчлэлийн талаар чиглэл өглөө.

Хөгжлийн банк олон улсын зах зээлээс 350 сая ам.долларын үнэт цаас арилжаалж санхүүжилт босгосон, Засгийн газрын шийдвэрээр өөрийн хөрөнгийг 1.5 их наяд төгрөгөөр нэмэгдүүлэх болсон. Гэвч нийт зээлийн 55.9 хувь буюу 891.9 тэрбум төгрөг нь чанаргүй ангилалд багтаж байгааг танилцууллаа. 

Алдагдсан боломж, чанаргүй зээлийн төлөлттэй зэрэгцээд хөрөнгө оруулагч, түншүүдийн итгэлийг эргэн сэргээх чухал байгааг Тэргүүн шадар сайд Н.Учрал уулзалтаар дурджээ.  Мөн Хөгжлийн банкыг цаашид хууль эрх зүйн хүрээнд “айх айдасгүй”  ажиллах боломжийг хангана гэж онцлон дараах чиглэлийг өгсөн байна.  

Үүнд:

• Өнгөрсөн 13 жилд хууль, бүтэц, удирдлагын бүрэлдэхүүн олон удаа өөрчлөгдсөн нь тогтворгүй байдлыг бий болгосон тул оновчтой бүтэц бүрдүүлж, “front office” болон “back office”-ийн зохистой харьцааг бий болгох, удирдлагад Азийн хөгжлийн банк, Дэлхийн банк зэрэг олон улсын санхүүгийн байгууллагын төлөөллийг оролцуулах;
• Төсөл санхүүжүүлэх шийдвэрийг эрэмбэлэлт, эдийн засгийн ач холбогдлын тооцоонд тулгуурлан гаргах, импортыг орлох үйлдвэрлэлийг дэмжих;
• Мөчлөг сөрсөн бодлого хэрэгжүүлэх;
• Төсөл сонгон шалгаруулалтыг ил тод болгох;
• Зээлийн эргэн төлөлтийг сайжруулах, санхүүжүүлэх төслийн нийгэм-эдийн засгийн үр өгөөжийг тооцож, эх үүсвэрийн төлөвлөгөөг энэ сарын дотор танилцуулах.

Тэрээр мөн Хөгжлийн банк худалдааны тэнцэлд эерэг өөрчлөлт оруулах, шинэ ажлын байр, шинэ эдийн засаг бий болгох төслүүдийг дэмжих ёстой. Арилжааны банк шиг өндөр өгөөжийн бус, харин өндөр эрсдэлтэй боловч стратегийн ач холбогдолтой төслүүдийг санхүүжүүлэх шаардлагатай гэв.