Эрчим хүчний сайд Б.Чойжилсүрэн ДЦС-4-т гарсан осол, хариу авч хэрэгжүүлж буй шуурхай арга хэмжээний талаар өнөөдөр /2026.01.21/ мэдээлэл хийлээ. 

Сайд Б.Чойжилсүрэн, 2025-2026 оны эрчим хүчний хэрэглээний өвлийн оргил ачаалал 1800МВт хүрэх болов уу гэсэн тооцоололтой байсан. 2026 оны 1-р сарын 19-ний байдлаар 1803МВт хүрсэн. Төвийн бүсийн нэгдсэн сүлжээнд 69 зуух залгаатай ажиллаж байгаагаас өнөөдрийн байдлаар 65 нь ажиллаж байна. Дөрвөн зуухны гэмтлийг устгах ажил явагдаж байна.

49 труба генератораас 43 нь ажиллаж байгаа бол гурван труба генераторын гэмтэл устгах ажил өрнөж байна. Дулааны цахилгаан станцууд 2026 оны нэгдүгээр сарын 20-ны байдлаар нүүрс нөөцлөлт дунджаар 10 хоног буюу 408 мянган тонн, мазутын нөөц 3023 тонн байна.

2026 оны 1-р сарын 20-ны өглөө 06.11 цагт ТЭЦ-4-ийн наймдугаар зууханд үлээлт гарсан тул зогсоохоос аргагүй шаардлага тулгарсан. 500^о С-тай ажиллаж байсан зуухыг 50 болгож бууруулсан. Эрчим хүчний салбарын бүх зуух, труба генераторууд нөөц тоноглолгүй ажиллаж байгаа учир аль нэг тоноглолд гэмтэл гарвал тэр хэмжээгээр хязгаарлалт хийхээс аргагүй нөхцөлд байна.

Хоёр дахь хүндрэл нь Бөөрөлжүүтийн цахилгаан станц тэжээгч талдаа буюу нүүрсийг цахилгаан станц руу дамжуулах шугамын нүүрс нь хөлдсөнөөс хүндрэл үүссэн. Хөлдсөн нүүрсийг гар аргаар буталж, тэжээгч шугамд шилжүүлэх ажил явагдаж байна. Одоо нэг цагийн дараанаас /11.30 цаг/ гайгүй болох болов уу. ТЭЦ-4-өөс өчигдөр орой тусгай бригад Бөөрөлжүүтийн станцад ажиллаж байна. Хэдэн цагийн дараа үр дүнг танилцуулна. 

ТЭЦ-4-ийн есдүгээр зуух буюу 500 тонн ус халаах хүчин чадалтай зуух барих төсөл боловсруулаад 10-аад жил болж байна. Би 2022 оны 8-р сард Эрчим хүчний сайдаар томилогдсоноос хойш энэ төслийн санхүүжилтийг улсын төсөвт суулгахаар хөөцөлдөж байна. Дунджаар 360 тэрбум төгрөгийн санхүүжилт шаардлагатай ч шийдэж чадаагүй.

ТЭЦ-5-ыг ашиглалтад оруулж байж Улаанбаатар хотын дулааны асуудал бүрэн шийдэгдэнэ. Төв аймгийн Баян сумын нутагт баригдаж буй 660МВт-ын цахилгаан станц 2027 онд ашиглалтад орно. Тэр үед Монгол Улсын төвийн бүсийн эрчим хүчний сүлжээ цахилгаан эрчим хүчийг нөөцлөх, тоноглолуудыг ээлжилж зогсоож, үйлчилгээ хийх бололцоотой болно.

-ТЭЦ-4 ДЦС-ын нэг зууханд гэмтэл гарснаас өчигдрөөс цахилгааны хязгаарлалт хийж байна. Цаашид ямар нэг гэмтэлгүй ажиллах боломжтой юу?
-Тоноглолд эвдрэл гарахыг үгүйсгэхгүй. Эрчим хүчний салбар ямар нэг нөөц тоноглолгүй ажиллаж байна. Ойрын гурав хоногтоо нэлээд хүйтрэх юм шиг байна. Энэ бол зөвхөн Монголд  үүссэн асуудал биш, ОХУ талдаа -50 градус давж хүйтэрч байгаа учир ОХУ өөрөө чадлын дутагдалд орж байна.

Гэхдээ өнөөдрийг хүртэл ОХУ-аас өдөрт 300МВт-ын цахилгаан эрчим хүчийг дутагдсан үед авсаар байна. магадгүй өнөөдөр хамгийн хүнд гэдгийг Оросын талаас хэлж байна. 300 биш 250МВт-ыг нийлүүлэхийг үгүйсгэхгүй. Гэхдээ нөхцөл байдлыг харж байгаад аль болох хязгаарлалт хийхгүйг хичээнэ.

Бид танайд аль болох хүндрэл үүсгэхгүйг хичээх болно. Манайд үүсээд буй нөхцөл байдлыг та бүхэн ойлгоорой” гэж ярьж байна. Бид Оросын талтай байнга холбоотой ажиллаж байна гэв.