Монголын Үндэсний Худалдаа, Аж Үйлдвэрийн Танхим (МҮХАҮТ)-д Монгол, Хятад хоёр улсын бизнес эрхлэгчдийн уулзалт боллоо.

Уг арга хэмжээнд хоёр улсын 300 гаруй компанийн төлөөлөл оролцож, худалдаа, хөрөнгө оруулалтын талаар хэлэлцэв.

Хөрөнгө оруулагчдад тулгамдаж буй асуудлын талаар МҮХАҮТ-ын Ерөнхийлөгч Б.Лхагважав "Ирэх таван жилд хөрөнгө оруулалтыг нэмэхэд эрх зүйн орчин, хөрөнгө оруулалтын нөхцөлд ямар асуудал байгааг харилцан дүгнэх ажлууд хийж байна.

Өнөөдрийн форумын эхний хэсэгт Хятадын хөрөнгө оруулагчид уул уурхай, хөдөө аж ахуй, хөнгөн үйлдвэр, барилгын салбарын хүрээнд тулгамдсан гол асуудлаа багцлан, Монголын холбогдох яамдтай ярилцаж, тодорхой хариултууд авсан.

Монгол Улс бүс нутгийн олон интеграцын төвд байрладаг.

Бид БНХАУ-тай хамгийн том худалдааны харилцаатайгаас гадна ОХУ, Зүүн хойд Азийн орнуудтай эдийн засгийн уялдаа холбоогоо тэлэх боломжтой.

Үүний тулд дэд бүтэц, эрчим хүч, дулаан хангамж, цахим хөгжил зэрэг салбарыг хурдацтай хөгжүүлэх шаардлагатай. Энэ нь өөрөө асар том бүтээн байгуулалтын боломж. Өмнө нь 30-40 тэрбум ам.доллароор яригдаж байсан бол цаашид улам тэлэх боломжтой.

16.5 тэрбум ам.долларын худалдааг БНХАУ-тай хийсэн. Форумын хүрээнд хоёр улсын худалдааны танхимууд хамтын ажиллагааны санамж бичигт гарын үсэг зурсан нь бодит бизнесийн хамтын ажиллагааг дэмжих чухал алхам боллоо” гэлээ.

БНХАУ-аас Монгол Улсад суугаа ЭСЯ-ны Эдийн засаг, худалдааны албаны зөвлөх Лиү Жинжи өнгөрсөн онд уул уурхайн салбарын худалдаа, хөрөнгө оруулалт тодорхой хэмжээнд өссөнийг онцлов. Тэрбээр "Хоёр орны Засгийн газрын уялдаа холбоог эрчимжүүлж, хамтын ажиллагааг илүү идэвхтэй болгохоос гадна Монгол Улсын Засгийн газар татварын тухай хуулийг сайжруулж, бизнесийн орчныг илүү таатай, тогтвортой болговол хоёр орны худалдаа нэмэгдэнэ” гэлээ.



Мөн татвар, эрх зүйн асуудал бизнес эрхлэгчдийн өдөр тутмын үйл ажиллагаанд хэрхэн нөлөөлж буйг бизнесийн төлөөлөл “Мэргэн тур” компанийн гүйцэтгэх захирал Т.Энхтөр "Монголын эдийн засаг уул уурхайн экспортод ихээхэн төвлөрсөн.



Уул уурхайгаас гадна хөдөө аж ахуйн гаралтай түүхий эд, бүтээгдэхүүнийг экспортлох нь чухал. Энэ чиглэлд Хятадын тал бодитой дэмжлэг үзүүлнэ гэдэгт итгэж байна. Түүнчлэн Хятадын барилгын компаниудын хөрөнгө оруулалт ч чухал ач холбогдолтой. Үйлдвэрийн барилга, үйлчилгээний зориулалттай барилга байгууламжийг хамтран хэрэгжүүлэх төлөвлөгөөтэй ажиллаж байна.

Хөдөө аж ахуйн бүтээгдэхүүнийг экспортлохтой холбоотойгоор гаалийн болон татварын зохицуулалтын асуудал гардаг.

Монгол Улсад импортын гаалийн татвар 5 хув бол БНХАУ-ынх 17 хувь байгаа нь экспортын өрсөлдөх чадварт нөлөөлдөг. Үүнийг бууруулах, тогтвортой нөхцөл бүрдүүлэх боломжийг судалж, хамтран ажиллах шаардлагатай” хэмээлээ.

Хүмүүнлэгийн ухааны их сургуулийн
Сэтгүүл зүй, медиа технологийн тэнхимийн
III ангийн оюутан Н.Номин