МАХН-ын цагаан байрны хурлын танхим дүүргэн чуул­сан “Зүүний хүчний холбоо”-ны анхдугаар хуралд Ерөнхий сайд М.Энхболд хүрэлцэн ирж баяртай байгаагаа илэр­хийлэв.

“Монголын улс тө­рийн амьдралд өнөөдөр нэгэн тэмдэглэлт үйл явдал болж байна” гэж тэр тодорхойлов. Түүгээр ч барахгүй М.Энх­болд дарга шинэхэн холбоог “МАХН-ын бодлогыг дэмжих зорилго бүхий төрийн бус байгууллага…” хэмээн шууд тодорхойлсон агаад “Шинээр үүсэн байгуулагдаж байгаа Монголын “Зүүний хүчний хол­боо”-ны хойшлуулшгүй, тэр­гүүн зэргийн зорилт бол өргөн олон түмэн, иргэд сон­гогчдод МАХН-ын бодлого, үйл ажил­лагааны онцлог, давуу талыг ойлгуулан тайл­барлаж, өөрс­дийн үйл ажиллагаагаараа нотлон баталгаажуулж, ил тодоор харуулах явдал мөн” хэмээн замыг нь заагаад өгчихлөө.

Ерөнхий сайд энэ үеэр сонгуулийн сурталчилгааг эрээлж цээрлэлгүй хийв. “Хэрэв 2008 оны УИХ-ын болон орон нутгийн сон­гуульд Монголын ард түмэн МАХН-д итгэл хүлээлгэж, УИХ-д олон­хи болговол төрийн албан хаагчдын дундаж цалинг 500 мянгад хүргэх боломж бий” хэмээн амлалаа, тэр. Иймэр­хүү рекламны “пауз”-ууд “Зүү­ний хүчний холбоо”-ны хурлыг сонгууль угтсан шоу хэмээн олон хүн дүгнэхэд хүргэсэн байж мэднэ. Харин Ерөнхийлөгч Н.Энхбаяр баяр хүргэсэн бичиг цаас ирүү­лээгүй агаад Жигүүрийн Ц.Оюун­баатар, Онц их хур­лын Т.Гантулга нар урилгаар оролцож, баяр хүргэлээ. Уг холбоог үүсгэн байгуулагч­дын нэг П.Дэлгэрнаран “Нийт 431 төлөөлөгч бүх аймаг, нийслэл, дүүргээс сонгогдож ирсэн. Анхдугаар хурлаар гол нь дүрмээ баталж, удирд­лагаа сонгоно. Холбоо аймаг, нийслэлд салбартай байх юм” хэмээн ярив. Хурал маш түргэн шуурхай явсан бөгөөд дүрэм батлах, удирдлагаа сонгох гэж ядаж төдсөнгүй. Танхим дүүргэхэд онцгойлон анхаарч, сайтар зохион бай­гуулсан бололтой. УИХ-ын гишүүн, сайд У.Хүрэлсүх “ногоон гэрэл”-ээр “Зүүний хүчний холбоо”-ны ерөнхий­лөгчөөр сонгогдлоо.

Шинэхэн ерөнхийлөгч тай­зан дээр зогссон чигтээ сэтгүүлчдийн асуултад ха­риул­сан юм.

-”Зүүний хүчний холбоо” дөрвөн жилийн өмнөөс яриг­даж байсан. Засгийн газар огцрох, эс огцрохтой Зүүний хүчний холбооны хурал ха­маагүй хэмээн тэрбээр хэл­сэн ч “Засгийн газар хэвийн үйл ажиллагаа явуулж байна. Засгийн газрыг өөрчлөхөөр Монголын ард түмэнд амжилт ирэхгүй” гэж ухуулав. “Сая “Зүүний хүчний холбоо”-ны хурлаар олон хүн МАХН-ын үзэл баримтлалд тодотгол хийх шаардлагатай . Намын ажлын арга барил, бүтэц зохион байгуулалт, боловсон хүчний бодлогод өөрчлөлт хийх ёстой гэж ярилаа. МАХН-ын шинэчлэлд тодорхой хувь нэмэр оруулсан хурал боллоо” гэж У.Хүрэлсүх дүгнэсэн юм. Харин юуг яаж шинэчлэх талаар тодорхой юм хэлсэнгүй. “Зүүний хүчний холбоо” МАХН-ын шинэчлэл, Хүний хөгжлийн талаар олон улсын хурал хийнэ. Шинжлэх ухаанд үн­дэс­лэсэн бодлого хэрэгжүү­лэх ёстой. Онол, практикийн бага хурлаар шинэч­лэлийн талаар баримт­лах үзэл бод­лоо тодорхойл­но” гэлээ. Хэдий­гээр Ерөн­хийлөгч нь Ерөнхий сайдад “хайр зарлаж” байгаа ч үүсгэн байгуулагчдын илтгэлд хөдөл­гөөн, жигүүрүүдэд ч найр тавьсан үг хаях нь сонсогдов. П.Дэлгэрнаран “Намын дэргэдэх төрийн бус байгууллага, жигүүр хөдөл­гөөнүүд, иргэний хөдөлгөө­нүүдтэй ажил хэрэгч яриа хэлэлцээр явуулах, олонхийн эрх ашгийн төлөө, хуулийн хүрээнд зохион байгуулж байгаа ажил хэрэгт хамтран оролцох бодлого чиглэл баримтална” хэмээн илтгэ­сэн. Мөн “Парламентын засаглалыг боловсронгуй болгох, нэг болон хэсэг бүлэг хүмүүсийн ноёрхлоос ангид байхын төлөө байна” хэмээн эрхэм зорилгоо тодорхойл­жээ. “МАХН-ын их, бага хурлын ажиллагаанд холбоо идэвхтэй оролцохын тулд санаачилгатай ажиллана” гэж тэмдэглэж байна лээ. Тэдний найдлага талаар өнгөрөхгүй нь МАХН-ын даргын үгнээс илэрхий. М.Энхболд хэлсэн үгэндээ “Та нарын дотроос ч олон хүн намын XXҮ Их хурлын төлөөлөгчөөр сонгог­дон ирэх байх гэж найдаж байна” гэж тал засан шагнаж байсан.

Хурлын төлөөлөгчдийн дунд Үйлдвэр, худалдааны дэд сайд Я.Содбаатар харагдав. Олны танил тө­лөөлөгч гэвэл жүжигчин Ц.Онон. Албархаг хувцас­ласан түүний шар үс содон харагдана. Хурлын ажиллагаа 16 цаг гэхэд ерөнхийдөө дууссан юм. Хурлын төлөөлөгчдийн үндсэн цөм нь Монголын ардчилсан социа­лист залуучуудын холбоо­ныхон гэдгийгээ нуусангүй. П.Дэлгэрнаран “МАСЗХ-г анх байгуулахад гар бие оролцон, залуу насны эрч хүч, итгэл сэтгэлээ харамгүй зориулж, ачааны хүндийг үүрч явсан журмын нөхөд маань өнөөдөр Монголын “Зүүний хүчний холбоо”-ны анхдугаар Их хурлын төлөө­лөгч­дийн дийлэнх олонхи нь байгааг тэмдэглэн хэлэхэд таатай байна” гэж онцолсон юм. Хурлын төлөөлөгчдийн дунд УИХ дахь МАХН-ын гишүүдийн туслахууд ч цөөнгүй харагдана лээ.

Жирийн төлөөлөгчид хурлаас юу хүсэн хүлээж, ямар дүгнэлттэй хоцорсныг сонирхов. Хурлын төлөөлөгч Д.Болор-Эрдэнэ “МАСЗХ-г үүсгэн байгуулсан хүмүүс Зүүний хүчний холбоог санаачилсан. Нам доторх хагарлыг эв нэгдэлтэйгээр шийдэх, хэрүүл уруул бага­тай байх үүднээс бид дэмжиж энэ холбоог байгуулалцаж яваа. МАСЗХ нас заадаг. 35 хүрээд “Зүүний хүчний холбоо”-нд элсэнэ гэж яриад байгаа. “Элсний” 13, “Улаан сарнай”-гаас “Зүүний хүчний холбоо” амбиц багатай болов уу гэж бодож байна. Тиймээс дэмжсэн” гэж ярилаа.

“Зүүний хүчний холбоо”-ны хурлаар МАХН-ынхан эв нэгдэлтэй, шинэчлэгдэж буй хэмээх мессеж олон нийтэд түгээхийг хичээсэн бололтой. Хуралд оролцогчид Сүхбаа­тар жанжны болон Чингэс хааны хөшөөнд цэцэг өргөсөн нь хуучны агаад танил дүр зураг байв.

Батсүхийн Янжмаа