Украины ерөнхийлөгч Володимир Зеленський энэ баасан гарагт АНУ-ын ерөнхийлөгч Дональд Трамптай Вашингтонд уулзаж, Украины ашигт малтмалын нөөцийг хамтран ашиглах гэрээ байгуулахаар болжээ.

Зеленський энэ гэрээг урьдчилсан хэлэлцээр хэмээгээд ОХУ-ын дайралтаас сэргийлэх аюулгүй байдлын баталгаа багтсан гэрээ байгуулахыг хүсэж буйгаа илэрхийлсэн.

Харин Трамп Украинд АНУ-ын олборлогчид ажиллаж, ховор металлын нөөцийг ашиглаж байгаа нь л өөрөө "хамгаалалт" болно гэж мэдэгдсэн байна. Тэрбээр Украин НАТО-д элсэх мөрөөдлөө мартах хэрэгтэй гэдгийг мөн хэлсэн.

Мөн Украин болон Оросын хооронд гал зогсоох тохиролцоо ойртож байгааг онцолжээ.

Ашигт малтмалын гэрээг анх өнгөрсөн онд Зеленський санал болгосон бөгөөд ингэснээр АНУ Украинд үзүүлэх дэмжлэгээ үргэлжлүүлэх хүсэлтэй болно гэж үзэж байв.

Гэвч гэрээний агуулгатай холбоотой зөрчилдөөн сүүлийн долоо хоногт Зеленський, Трампын хооронд үл ойлголцлыг үүсгэсэн.

Украины ерөнхийлөгч АНУ-аас 500 тэрбум ам.долларын ашигт малтмалын нөөцийн эрх авах саналыг эхэндээ няцааж байсан ч АНУ энэ дүнг бууруулсан гэж эх сурвалжууд мэдээлж байна.

Эх сурвалж: ВВС