Японы Фүкүшима хотын захиргаа хог хаягдлаа зөв ангилаагүй, хэмжээнээс нь хэтрүүлсэн иргэдийн нэрийг нийтэд зарладаг болох гэнэ.

Долоо хоногийн хугацаанд хогоо ангилаагүй хаясан бол холбогдох ажилтнууд хогийг шалгаж, эзнийг нь илрүүлэх арга хэмжээ авах аж.

Эхлээд сануулах, дараа нь бичгээр мэдэгдэх, эцэст нь дүрэм зөрчсөн хүний нэрийг Засгийн газрын цахим хуудаст нийтлэх юм байна. Энэ нь ирэх оны гуравдугаар сараас хэрэгжиж эхэлнэ.

Хувь хүний нууцлалтай холбоотой байж болох учир хог шалгах явцыг нууц байдлаар хийх аж.

Япон улс нь хог хаягдлыг ангилж хаях хатуу дэг журамтай. Хог хаягдлыг бууруулж, дахин боловсруулахыг зорьсон үндэсний бодлогын хүрээнд орон нутгийн засаг захиргаанууд өөрсдийн арга хэмжээг авч хэрэгжүүлдэг.

Өнгөрсөн онд Фүкүшима хотод хог хаягдлын дүрэм зөрчсөн 9000 гаруй тохиолдол бүртгэгджээ.

Фүкүшима хотын иргэд хогоо өглөө бүр 08:30 цагаас өмнө хогийн цэг дээр байрлуулах шаардлагатай бөгөөд өмнөх шөнө нь гадаа гаргаж үлдээхийг хориглодог.

Хог хаягдлыг шатдаг хог, шатдаггүй хог, дахин боловсруулах хог гэсэн гурван төрлөөр ангилж, өөр өөр цагийн хуваарийн дагуу хураан авдаг аж.

Түүнчлэн гэр ахуйн цахилгаан хэрэгсэл, тавилга гэх мэт заасан хэмжээнээс том зүйлсийг ачуулахын тулд оршин суугчид хураах урьдчилж цаг захиалах шаардлагатай байдаг юм байна.

Эх сурвалж: ВВС