УИХ-ын чуулганы өнгөрсөн баасан гарагийн /2025.03.29/ нэгдсэн хуралдаанаар Монгол Улсын Ерөнхий сайд Л.Оюун-Эрдэнэ Монгол Улсыг 2021-2025 онд хөгжүүлэх таван жилийн үндсэн чиглэл, Монгол Улсын Засгийн газрын 2024-2028 оны үйл ажиллагааны хөтөлбөрийн 2024 оны гүйцэтгэлийн тайлан болон Монгол Улсын хөгжлийн 2024 оны төлөвлөгөөний гүйцэтгэлийн тайланг танилцууллаа.

Энэ үеэр УИХ-ын гишүүд Ерөнхий сайд болон холбогдох сайд нараас улс орны нийгэм эдийн засаг болон тойрогтоо тулгамдсан асуудлуудыг дэвшүүлж, хариулт авсан юм. Гишүүдийн тавьсан асуултад холбогдуулан Ерөнхий сайд бүсчилсэн хөгжлийг дэмжих чиглэлээр хэрхэн ажиллахаа танилцуулав.

Л.Оюун-Эрдэнэ, УИХ-ын сонгуулийг бүсчилсэн тойргоор явуулсан. Өнгөрсөн жил Засгийн газар нийслэлийн асуудалд төвлөрч, хөрөнгө оруулалт хийсэн. УИХ-ын хаврын чуулгантай уялдуулан, ирэх жилийн улсын төсөв хэлэлцэж эхлэхээс өмнө Засгийн газрын гишүүд бүсээс сонгогдсон УИХ-ын гишүүдийн хамт бүс бүхэнд ажиллах хуваарь гарсан.

Бүсээс сонгогдсон ИТХ болон УИХ-ын гишүүд хамтарч хэлэлцүүлэг хийгээд, шийдвэрлэх асуудлыг гаргаж ирнэ. Үүн дээр Засгийн газрын гишүүд орж ажиллаж асуудлуудаа эрэмбэлж, Засгийн газраар шийдвэрлэх чиглэлээр ажиллана. Бүс эдийн засгийн хувьд бие даан хөгжих боломжийг бүрдүүлэхэд анхаарах нь чухал юм гэлээ.