ОХУ-ын Interfax.ru  мэдээллийн агентлагийн мэдээлснээр Евразийн эдийн засгийн холбоо (ЕАЭЗ)-ны гишүүн орнууд болон Монгол Улс чөлөөт худалдааны түр хэлэлцээр байгуулахтай холбоотой үлдсэн асуудлуудыг амжилттай тохиролцлоо гэв.

Энэ талаар Евразийн эдийн засгийн комиссын (ЕЭК) худалдааны хэлтэс мэдээлсэн бөгөөд тус комиссын худалдааны асуудал хариуцсан сайд Андрей Слепнев Монгол Улсын Шадар сайд, Эдийн засгийн хөгжлийн сайд, Улсын Их Хурлын гишүүн Л.Гантөмөртэй уулзаж, хэлэлцээ хийсний дараа албан ёсоор зарлажээ.

“Бид хоёр талд үлдсэн асуудлуудаа нарийвчлан ярилцаж, үр дүнтэй хэлэлцээр хийлээ. Монгол Улс бол бидний хамгийн ойрын хөрш, найрсаг харилцаатай орон. Тиймээс хамтын ажиллагаагаа улам өргөжүүлэх хүсэл эрмэлзэлтэй байна” хэмээн Слепнев онцлов.

ЕАЭЗ болон Монгол Улсын хоорондох энэхүү түр худалдааны хэлэлцээрийг байгуулах ажлыг 2024 оны 5-р сарын 8-нд болсон Евразийн эдийн засгийн дээд зөвлөлийн хурлын шийдвэрийн дагуу эхлүүлсэн юм. Энэхүү хэлэлцээр гурван жилийн хугацаатай хэрэгжихээр төлөвлөгдөж байгаа бөгөөд хоёр тал тус бүр 375 нэр төрлийн бараа, бүтээгдэхүүний гаалийн татварыг бууруулахаар тохиролцоонд хүрчээ гэсэн байна.

Эдийн засгийн хөгжлийн яам ОХУ-ын холбогдох талтай ирэх арванхоёрдугаар сард гэрээг баталж, 2025.01.01-нээс хэрэгжүүлэхээр төлөвлөж байсан талаар мэдээлж байв.

Эх сурвалж: Interfax.ru