Саяхан Монголбанкны болон Санхүүгийн зохицуулах хорооны тодорхой албан тушаалд нэр дэвшигчдээс сонгон шалгаруулж, шинэ томилгоо хийсэн билээ.

Энэ талаар Монгол Улсын Их Хурлын дэд дарга, УИХ-ын гишүүн Х.Булгантуяа “Санхүүгийн зохицуулах хорооны Хяналтын зөвлөлийн даргад газар зохион байгуулагч, газар зохион байгуулагчаараа 20 жил ажиллаж Газрын харилцаа, геодези, зураг зүйн газрын орлогч дарга байсан хүнийг сонголоо. Санхүүгийн салбар ийм байхад яаж хөгжих юм бол оо. Иргэд санхүүгийн зах зээлд яаж итгэх вэ. Та бүхэн өөрсдөө хараад үнэлэлт, дүгнэлт хийнэ биз дээ” хэмээн өөрийн сошиал хуудаст томилгоог эсэргүүцэн үзэл бодлоо илэрхийлсэн.

Энэ салбарыг удирдах, хянах гэж байгаа  албан тушаалтан нь мэргэжлийн бөгөөд хариуцлагатай нэгэн байх ёстой.

Бид түүнээс энэ талаар дэлгэрэнгүй тодруулахад "Нэр дэвшигчдийн материудаас холбогдох байнгын хорооноос сонгон шалгаруулалт хийж шалгаруулалтын процесс үргэлжилсэн юм шиг байсан. Манай салбарын хүмүүс хүсэл зориг муутай, "Дээгүүрээ шийдчихдэг юм чинь дээ" гэсэн хандлагаар хойш суугаад байна уу даа гэж боддог. Манай санхүү эдийн засгийн салбарынхан үнэхээр мундаг хүмүүс байдаг. Өндөр ЭЕШ-ын оноотой байж л МУИС-ийн Эдийн засгийн сургууль, Санхүү эдийн засгийн дээд сургуульд ч оюутан болж элсэн ордог. Мөн гаднын их сургуульд суралцаж төгссөн хүмүүс энэ мэргэжлийнхэн гол төлөв байдаг.

Нэг үеэ бодоход Монгол Улсын санхүүгийн салбар нэлээд хөгжсөн. Тэгэхээр энэ салбарыг удирдах, хянах гэж байгаа  албан тушаалтан нь мэргэжлийн бөгөөд хариуцлагатай нэгэн байх ёстой. 200 гаруй мянган төрийн албан хаагч байгаа бол нөгөө талдаа дарга нь бусдын өмнөөс хариуцлага хүлээх чухал албан тушаал буюу байгууллагын хөгжлийн тодорхойлогч байдаг. Тиймээс томилгоонд 100 хувь мерит зарчим үйлчлэх ёстой гэж би боддог. Яагаад мэргэжлийн бус хүн материалаа ирүүлж, сонсголд орж ирж, цаашлаад сонгогдсон байгаад бухимдлаа илэрхийлсэн юм. Нөгөөтээгүүр иргэд, салбарын хүмүүс ч уг томилгоонд дургүйцлээ илэрхийлэн надад хандсан" гэсэн юм.