#CS2 "Tier 1" түвшний тэмцээний хагас шигшээд шалгарсан анхны Ази баг The MongolZ мажорын аварга Францын Team Vitality-д хожигдож тэмцээнээ дуусгалаа.

ESL-ээс жил бүр зохиодог CS2 (Counter Strike 2)-ын томоохон тэмцээнүүдийн нэг "Intel Extreme Masters Katowice 2025" Польшийн Катовице хотод үргэлжилж байна.

$1,000,000 шагналын сантай тэмцээнд уригдан оролцож playoffs, цаашлаад хагас шигшээ шатанд шалгарсан анхны Ази баг болсон Монголын "The MongolZ" баг өнөөдөр хагас шигшээ шатанд тоглолоо.

Valve (Counter Strike 2 тоглоомыг хөгжүүлэгч компани)-ын чансаагаар хамгийн дээд түвшин буюу "Tier 1" түвшний тэмцээний хагас шигшээ шатанд анх удаа шалгарсан тэд дэлхийн аварга Францын "Team Vitality"-д хожигдлоо.

Тоглолт 0-2 (Mirage 7-13, Nuke 9-13) харьцаагаар дуусахад франц багийн мэргэн бууч Матью "ZywOo" Хербо тоглолтын шилдгээр нэрлэгдлээ.

• The MongolZ "IEM Katowice" тэмцээний хагас шигшээд шалгарлаа
• "BLAST Rising Asia Spring 2025" тэмцээнд Монголын хоёр баг уригдлаа
• The MongolZ playoffs шатанд Туркийн Eternal Fire-тай тоглоно

Хоёр баг өмнө "IEM Rio 2024" тэмцээний хүрээнд таарахад 0-2 харьцаагаар Дэн "apEX" Мадэсклэйр ахлагчтай Vitality хожиж байв.

Баянбатын "maaRaa" Эрдэнэдалай дасгалжуулагчтай The MongolZ ийнхүү тэмцээнээ дуусгаснаар шагналын 80,000 ам.долларыг (276 сая төгрөг) авна.

Харин 2024 оны "IEM Cologne 2024" тэмцээний аварга Vitality баг шинэ гишүүн Робин "ropz" Күүлийн хамт анхны тэмцээндээ түрүүлэхэд нэг алхам ойртлоо.