Талбайн теннисний дөрвөн их дуулгын нэг, оны гурав дахь их дуулга Wimbledon-ы эрэгтэйчүүдийн ганцаарчилсан төрлийн финал таван сет үргэлжилж шинэ аварга төрлөө. Дархан аварга Сербийн Новак Жоковичийн хожлын цувралыг 20 настай, Испани залуу зогсоов.

Wimbledon-ы 7 удаагийн аварга, их дуулгад 23 удаа түрүүлснээр бүх цаг үеийн шилдгээр тодроод буй 36 настай Новак Жокович энэ оны эхний хоёр их дуулгад түрүүлээд байсан юм.

Харин өнгөрсөн жилийн АНУ-ын нээлттэй тэмцээнд түрүүлж их дуулгын анхны цомоо өргөсөн Карлос Алкараз их аваргын хожлын цуврал, дээд амжилт тогтоох боломжийг нэг удаа зогсоолоо.

Финалд Карлос Алкараз 1-6, 7-6(8-6), 6-1, 3-6, 6-4 харьцаагаар хожсон бөгөөд "Ногоон зүлэгт талбайд дурлаж, мөрөөдөл минь биеллээ" хэмээжээ.

Тэр энэ амжилтад ийм хурдан хүрнэ гэж төсөөлөөгүй гэв. "Би хожигдсон ч өөрөөрөө бахархаар байлаа. Энэ гайхалтай спортын домогтой тоглож аварга болно гэдэг үгээр хэлэмгүй".

Харилцан оноо авсан олон сет тоглолтын үеэр их аваргын нэр хүндийг дагасан дарамтын хамт тоглох Жоковичид хэцүү байсан нь гарцаагүй. Харин заавал түрүүлнэ гэсэн хүлээлтгүй залуу хүү биеэ суллаж сэтгэл санаагаа цэгцлэн аваргын цомыг гуядаад авлаа.

Новак Жокович Английн ногоон зүлэг дээр өмнөх дөрвөн жилд дараалан түрүүлээд байсан билээ.