Улаанбаатар хотын Зорчигч тээврийн үйлчилгээг сайжруулах, сэргээх төслийг Япон Улсын засгийн газрын тусламжтайгаар 1995-1997 оны хооронд 3 үе шаттай хэрэгжүүлж байв.

Энэ тусламжаар:

• 60 Ниссан дизель,
• 40 Хино маркийн нийт 100 автобусыг сэлбэг болон техникийн үйлчилгээ засвар хийх барилга, тоног төхөөрөмжийн хамт Япон Улсын засгийн газраас Монгол Улсад нийт 30 гаруй сая ам.долларын хөрөнгийг шийдэж, тухайн үеийн нийслэлийн нийтийн тээвэрт үнэтэй хөрөнгө оруулалтыг хийсэн юм.

Тусламжийн үр ашгийг нарийн тооцохын тулд 1997 оны сүүлийн хагас жилээс Автобус-1 компанийг Японы тусламжтайгаар байгуулсан. Нийт автобусыг 10-12 жил ашиглаж, гүйлт 810-955.000 км-т хүрч, үүнээс есөн автобус сая гаруй км-ээс дээш явжээ.

-Япон Улсаас Монгол Улсад суугаа Элчин сайд Х.Кобаяши:
-1972 оны хоёрдугаар сарын 24-нд хоёр орны хооронд дипломат харилцаа тогтсоноос хойш Япон Улсын засгийн газар Монгол Улсад олон төрлийн тусламж үзүүлсээр ирсэн. Түүний дотор Монгол Улс ардчилсан нийгэмд шилжсэн хүнд цаг үе буюу 1994-1995 онд Японоос буцалтгүй тусламжаар “Улаанбаатар хотын Зорчигч тээврийн үйлчилгээг сайжруулах төсөл” сэтгэлд тодхон үлджээ.

Түүнээс хойш 24 жил өнгөрсөн ч нэгдүгээр баазын инженер техникийн ажилчид тус засварын баазыг хайр гамтай ашиглаж байгааг өнөөдөр хараад сэтгэл өндөр байна.

Дээр дурдсан төслөөр нийлүүлсэн 100 автобусны нэг болох энд байгаа автобусыг хараад сэтгэл хөдөллөө” хэмээн сэтгэгдлээ илэрхийлсэн юм.

Маргааш буюу хоёрдугаар сарын 24-ний өдөр хоёр улс дипломат харилцаа тогтоосны ойн баярын мэндчилгээг өлгөсөн 50 автобус үйлчилгээнд гарна.

Гэрэл зургуудыг: Г.Өнөболд