Эрчим хүчний салбарын хөгжил, реформын судалгааны ажлын дунд шатны тайлангийн хэлэлцүүлэг өнөөдөр боллоо. Хэлэлцүүлгийн үеэр ЭХЯ-ны Төрийн нарийн бичгийн даргын үүргийг түр орлон гүйцэтгэгч Б.Ерэн-Өлзий мэдээлэл өгөв.

Тэрээр хэлэхдээ, Эрчим хүчний тухай хууль 2001 онд батлагдсан. Бидэнд хууль эрх зүйгээ шинэчилж, зах зээлийн харилцааны дараагийн түвшинд шилжих шаардлага үүссэн. Цахилгаан, дулааны эрчим хүчний өрсөлдөөнийг хэрхэн бий болгох вэ гэдэг нь чухал. Өрсөлдөөн бий болсон тохиолдолд л үнэ зах зээлийн зарчмаар зөв тогтоно. Түүнчлэн цахилгаан эрчим хүчийг борлуулах талбарт өрсөлдөөн бий болгох боломжтойг онцлов.

Мөн энэ өвөл ДЦС-3 бүрэн хүчин чадлаар дулаанаа нийлүүлж чадах эсэхийг тодруулахад, 2025 оны төсвийн тодотголоор Дулааны 3-р цахилгаан станцын 50 мВт-ын турбин генераторын гэмтлийг засах, шинээр тоног төхөөрөмж суурилуулах бүх санхүүжилтийг шийдвэрлэсэн. 

Турбин генератрыг шинээр авч суурилуулах ажлыг тус компани дээр томилогдсон бүрэн эрхт төлөөлөгч хариуцан, төслийн гүйцэтгэгчийг шалгаруулах ажлыг хийж байгаа. 50 мВт-ын турбин гэмтсэнтэй холбоотойгоор хотын дулаан хангамжид дутагдал үүсэх эрсдэл бий.
Үүнийг урьдчилан сэргийлэх зорилгоор нэмэлт дулаанжуулалтын тоноглол суурилуулж байгаа. Тэгснээр өнгөрсөн өвөлтэй харьцуулахад ДЦС-3-аас нийлүүлэх дулаан тасалдахгүй, хотын хэрэгцээг хэвийн хангана гэв.