Энэ оны долоодугаар сарын 9-ний өдрийн Засгийн газрын тогтоолоор “Эрдэнэс Тавантолгой” ХК-д онцгой дэглэм тогтоож, Бүрэн Эрхт Төлөөлөгч (БЭТ)-ийн баг томилон ажиллуулсан.

Тус багийг ахалсан У.Бямбасүрэн гурван сарын хугацаан дахь ажлын үр дүнгийн талаар танилцууллаа. Тэрбээр "Өнөөдрийн байдлаар олборлолтын хэмжээ 22 сая тоннд хүрсэн. Энэ жилийн борлуулалт 18.6 сая тонн. Экспортын хэмжээ 20 сая тонн он гарсаар гаргасан. Орлогын хэмжээ нэг тэрбум 170 сая ам.долларт хүрсэн. Татварт 1.16 их наяд төгрөг төлсөн. Биржийн экспорт 4.4 сая тоннд хүрсэн. 

Онцгой дэглэмийн гурван сарын хугацаанд борлуулалтын хэмжээ эхний хагас жилтэй харьцуулахад сарын дундаж 1.6 дахин, биржийн тээвэр 2 дахин, экспорт 1.3 дахин, орлого 1.3 дахин, олборлолтын хэмжээ 1.2 дахин өссөн амжилтыг үзүүлсэн. 

Зургаадугаар сард Гашуунсухайт-Ганцмод боомтоор өдөрт 462 машин гарч байсан бол долоодугаар сард 610, наймдугаар сард 752, есдүгээр сард өдрийн дундаж 880 болж нэмэгдсэн байна. 

Биржийн борлуулалтыг бид онцгой анхаарлаа. Монгол Улсын байгалийн баялаг ард түмэнд ил тод, нээлттэй, хяналттайгаар арилжаалагдах ёстой. Иймд онцгой дэглэмийн хугацаанд 120 арилжааг Монголын хөрөнгийн биржээр хийсний 79 нь амжилттай болсон. 

Биржийн зогссон гэрээ гэж 29 гэрээний асуудал байсан. Өндөр үнэтэй байхад нь нүүрс худалдаж аваад, ачилт, татан авалтаа Хятадын тал зогсоосон байсан. Энэ гэрээний хэлцлүүдийг хийж, 15-ыг нь шийдвэрлэсэн. Ингэхдээ Монгол Улсад орж ирсэн валютаас нэг цент ч буцааж гаргахгүй, гэрээний нөхцөлийг тогтохдоо өмнөх буюу өндөр үнэтэй байсан үеийн үнийг ашиглана.

БНХАУ-ын зах зээлийн гүн рүү нүүрс экспортлох ажлыг мөн онцгой дэглэмийн хугацаанд хийсэн. Монголын хөрөнгийн биржээр дамжуулан баяжуулсан коксжих нүүрсийг БНХАУ-ын Цао Фейдянь боомтод хүргэсэн. Ганцмод боомт дээр 100 орчим ам.доллароор зарагдах энэ нүүрс тус боомтод хүрснээр 165 ам.долларт хүрч зарагдсан. Цаашид БНХАУ-ын зах зээлийн гүнд арилжаа хийх, үүн дээр суурьлаад гуравдагч орнууд руу экспорт хийх бололцоо бүрдсэн" гэлээ.