Канад Улсын Гадаад хэргийн яамны санхүүжилттэй “Уур амьсгалын өөрчлөлтөд дасан зохицох, даван туулахад орон нутгийн боломжийг нэмэгдүүлэх-Экко фарм” төсөл хэрэгжиж буй.

Төслийн хүрээнд Канад улсын Саскачеваны их сургуулийн Ургамал судлалын тэнхимийн зөвлөх профессор, доктор Боб Борс, судлаач Анже Швара нар ХХААХҮЯ-ны мэргэжилтнүүдтэй уулзжээ.

Уулзалтаар Ургамал газар тариалангийн эрдэм шинжилгээний хүрээлэнгийн жимс жимсгэний судалгааны талбайд ажиллаж, хүйтэнд тэсвэртэй жимсний сортуудыг Монгол орны нөхцөлд нутагшуулах боломжийг хэлэлцсэн аж.

Мөн манай улсад хийсэн жимс, жимсгэний сортуудын туршилтын үр дүнд шинжилгээ хийж, цаашид хэрэгжүүлэх үйл ажиллагааны талаар санал солилцож, Төвийн бүсийн үйлдвэрлэл эрхлэгчдийн төлөөлөлтэй уулзалт зохион байгуулсан байна.

Хамтын ажиллагааны хүрээнд Монгол орны уур амьсгалд тохирсон, хүйтэнд тэсвэртэй жимсний сортуудыг нутагшуулах, судалгаа шинжилгээг эрчимжүүлэх, үйлдвэрлэл эрхлэгчдийг шинэлэг шийдлээр дэмжих чиглэлд ажиллахаар талууд санал нэгджээ.