Засгийн газрын хуралдааны шийдвэрийг танилцуулж байна. 

Аж үйлдвэр, эрдэс баялгийн сайд Г.Дамдинням, Ерөнхий сайд Г.Занданшатарын захирамжаар улсын хэмжээнд бүртгэлтэй байгаа ашиглалтын болон хайгуулын тусгай зөвшөөрлийн тооллого явуулах гэж байна. Тооллого явуулна гэдэг нь анх тусгай зөвшөөрөл олгсоноос хойш хэн хэн гэдэг хүн хэчнээн удаа дамжиж, өнөөгийн түвшинд хүрсэн. Энэ хугацаанд тухайн ордыг ашиглаж байсан бол АМНАТ төлсөн үү? Улсад ямар хэмжээний татвар төлж байсан бэ? гэдгийг шалгах ажлын хэсэг байгуулж, энэ мэдээллийг нийтэд ил гаргах гэж байна. Хууль хяналт, татвар зэрэг байгууллагын төлөөлөл багтсан ажлын хэсгийг АҮЭБ-ийн сайд ахална.

Монгол Улсад бүртгэлтэй ашиглалтын 1768, хайгуулын 973 тусгай зөвшөөрөл хүчин төгөлдөр байна. Ашиглалтын тусгай зөвшөөрөл нь нийт газар нутгийн 3.1 хувь, хайгуулынх 1.3 хувийг эзэлж байна.

Бүх газар нутагтаа ашигт малтмалын тусгай зөвшөөрөл олгосон гэх ташаа ойлголт ард иргэдийн дунд байдаг учир үүнийг зориуд хэлж байгаа юм. Монгол Улсын нийт газар нутгийн 80 хувь нь улсын тусгай хамгаалалттай болон бусад хууль, тогтоомжоор нөөцөд бүртгэгдсэн, ашигт малтмалын тусгай зөвшөөрөл олгох боломжгүй байдаг.
 
Үлдсэн 20 хувьд хайгуулын болон ашиглалтын тусгай зөвшөөрөл олгох боломжтой ч дийлэнх газар нь ямар нэг илэрцгүй газар байдаг.