2026 оны улсын төсвийн төсөлд иргэд, олон нийтийн саналыг авах хэлэлцүүлэг 8-р сарын 4-нөөс эхэллээ. Зам, тээврийн салбарын төсвийн төслийг өчигдөр хэлэлцсэн  бөгөөд энэ үеэр иргэн ЗТХ-ийн сайд Б.Дэлгэрсайханаас “Улс орнууд дайн өдүүлсэн ОХУ-аас холбоо харилцаагаа тасалж байхад Монгол Улс яагаад ОХУ руу нислэг хийж байна вэ?” гэж асуув.

Сайд Б.Дэлгэрсайхан, 2022 он буюу цар тахлаас өмнө Улаанбаатар-Москва-Берлиний чиглэлд нислэг үйлдэж байсан. Одоо зогссон. Монгол Улсын Ерөнхийлөгч ОХУ-д айлчлал хийх үед ОХУ-ын талаас “Хуучин нислэгийг сэргээе” гэсэн асуудлыг тавьсан.

Монгол Улсын онгоц ОХУ руу нислэг хийхгүй байгаа. Харин ОХУ-ын онгоцыг манай улс хүлээн авч байна. Оросын онгоцыг хүлээн авахдаа манай улс нэг болзол тавьсан. Тэр нь, Зөвхөн ОХУ-ын өмчлөлийн онгоцыг хүлээн авна. Гуравдагч хөршийн буюу өөр улсын өвчлөлийн онгоц бол хүлээн авах боломжгүй гэсэн болзол юм.

Нөгөө талаас, Монгол Улс уул ус, газар нутгаар холбогдсон хоёрхон хөрштэй. Бид хаашаа ч нүүхгүй.  Тиймээс ямар ч цаг үед бид хөрштэйгээ эв найрамдалтай амьдрах үүрэгтэй. 

Монгол Улс шатахууны хэрэгцээгээ ОХУ-аас хангадаг. Сая ОХУ улс орнуудад нийлүүлэх шатахууны экспортоо зогсоох шийдвэр гаргасан ч Монгол Улсад нийлүүлэх экспортдоо хориг тавиагүй гэв.