Улаанбаатар хотын агаарын бохирдлыг бууруулах ажлын хүрээнд энэ онд нийслэлийн Чингэлтэй, Баянгол дүүргийн таван хорооны 5000 өрхийг дулаалж, хийн халаагуурт шилжүүлэх ажил хийхээр болжээ.

Нийслэлийн Засаг даргын Нийгмийн салбар, ногоон хөгжил, агаар орчны бохирдлын асуудал хариуцсан орлогч А.Амартүвшин ОХУ-ын Монгол дахь худалдааны төлөөлөгч Максим Викторович Васильев, мөн БНХАУ-ын “Шандон Шинке Холдинг” ХХК-ийн Ерөнхий захирал Ин Бээжин тэргүүтэй төлөөлөгчдийг хүлээн авч уулзсан байна.

Уулзалтаар хийн түлшний хэрэглээний төлөвлөлт, байгалийн шингэрүүлсэн хий боловсруулах үйлдвэр байгуулах, дэд бүтцийн төслүүдэд хөрөнгө оруулалтыг нэмэгдүүлэх асуудлаар санал солилцжээ.

Нийслэлийн Засаг даргын орлогч А.Амартүвшин “Одоогийн байдлаар нийслэлд 200 мянга гаруй өрх хатуу түлш буюу сайжруулсан шахмал түлш хэрэглэж байгаа бөгөөд өвлийн улиралд энэ тоо өсөх хандлагатай байна.

Тиймээс Улаанбаатар хотын хөгжлийн 24 мега төслийн хүрээнд “20 минутын хот” нэгдсэн төлөвлөлтийн дагуу Сэлбэ, Баянхошуу, Ханын материалд 20 мянган айлын цогцолбор хорооллын бүтээн байгуулалтыг эхлүүлсэн.

Мөн Чингэлтэй, Баянгол дүүргийн агаарын бохирдол ихтэй таван хорооны 5000 өрхийг дулаалж, хийн халаагуурт үе шаттайгаар шилжүүлэх ажлыг эхлүүлээд байна.

Цаашид агаарын чанар сайжруулах бүсийн айл өрхүүдийг цахилгаан болон хийн халаагуурт шилжүүлэхэд шаардлагатай судалгааг хийхээр төлөвлөсөн. Энэхүү төслүүдэд хамтран ажиллахыг хүсэж байна” гэдгийг онцоллоо.

Харин ОХУ болон БНХАУ-ын төлөөлөгчид хамтын ажиллагаагаа улам өргөжүүлэн, Улаанбаатар хоттой илүү ойр нягт хамтран ажиллахад бэлэн байгаагаа илэрхийлсэн байна.