ТИКА, Монголд эмэгтэйчүүдийн хөдөлмөр эрхлэлтийг дэмжлээ.

Туркийн хамтын ажиллагаа, зохицуулах агентлаг (ТИКА)Говь-Алтай аймагт үйл ажиллагаа явуулдаг Алтайн эмэгтэйчүүдийн хоршоонд аж үйлдвэрийн зориулалттай тоног төхөөрөмжийн дэмжлэг үзүүллээ.

2014 онд ажилгүй, өрх толгойлсон, хөгжлийн бэрхшээлтэй хүүхдээ асардаг есөн эмэгтэй нийлж тус хоршоог байгуулжээ.

Өнөөг хүртэл бүс нутагт эмэгтэйчүүдийн эдийн засаг, нийгмийн оролцоог дэмжиж ажиллаж байна. Хонины ноосоор гар урлал, бэлэг дурсгал, өвлийн хувцас, гутал үйлдвэрлэдэг тус хоршоо зарим бүтээгдэхүүнээ экспортолдог. Гэвч бүхэлдээ гар арга дээр суурилсан үйлдвэрлэл удаан, зардал ихтэйн улмаас бүтээмжийг хязгаарлаж байв.

ТИКА-гаас нийлүүлсэн оёдлын машинууд, эсгүүрийн машин, халуун пресс, сүлжмэлийн машин, эсгийлэгч машинуудыг ашиглан үйлдвэрлэлийн үйл явц хурдсан, бүтээмж эрс нэмэгдсэн. Тухайлбал, өмнө нь өдөрт нэг хос эсгий гутал үйлдвэрлэдэг байсан бол одоо эсгийлэгч машинаар хоёр цагийн дотор дөрвөн хос эсгий гутал үйлдвэрлэдэг болжээ.

66 гишүүнтэй болсон тус хоршоо ноосноос гадна арьс шир, даавуу бусад материалаар бээлий, оймс гэх мэт шинэ бүтээгдэхүүн үйлдвэрлэж эхэлжээ. Мөн өөрийн гишүүд, бусад эмэгтэйчүүдэд оёдол, эсгий, ноосон бүтээгдэхүүн үйлдвэрлэл чиглэлээр сургалт явуулж эхэлжээ.

Говь-Алтай аймгийн Засаг даргын орлогч М.Алтангэрэл тоног төхөөрөмж гардуулах ёслолд хэлсэн үгэндээ Туркийн ард түмэнд талархал илэрхийлж, эмэгтэйчүүдийн хөдөлмөр эрхлэлт, нийгмийн эв нэгдлийг хангахад ТИКА-гийн дэмжлэг үнэлж баршгүй их гэв.

Хоршооны захирал Б.Батсайхан "Манай хоршоог дэмжин ажиллаж байгаад эмэгтэйчүүдийнхээ өмнөөс баярлалаа. Та бүхний ачаар олон эмэгтэйг ажилтай, амьжиргаатай болгох мэргэжлийн сургалтад хамрагдах боломж бүрдлээ" гэжээ.