Засгийн газрын 2018 оны 62, 2022 оны 223 дугаар тогтоолын хэрэгжилтийн хүрээнд нийслэлийн Засаг даргын 2025 оны А/1052 дугаар захирамж гарсан. Үүний дагуу Улаанбаатар хотын 174 уурын болон усан халаалтын зууханд ирэх есдүгээр сарын 15-наас эхлэн түүхий нүүрс хэрэглэхийг бүрэн хориглох юм.

Нийслэлийн Агаар, орчны бохирдолтой тэмцэх газрын дарга Д.Мөнхбаатарын хэлснээр, Өнгөрсөн онд халаалтын улиралд 174 ширхэг зууханд 87 мянга гаруй тонн түүхий нүүрс түлсэн. Түүхий нүүрсний агаарт ялгаруулах бохирдлын хэмжээг мидлинг, хагас коксон түлштэй харьцуулахад хамаагүй их. Судалгаагаар Багануурын түүхий нүүрсний дэгдэмхий чанар 44 хувь байдаг бол мидлинг 22 хувь, хагас кокс 11 хувьтай байсан.

Тиймээс уурын болон усан халаалтын зуух, ААН-үүдийг түүхий нүүрс түлэхийг зогсоож, мидлинг буюу баяжуулсан нүүрсний хэрэглээнд ирэх есдүгээр сарын 15-аас шилжүүлнэ. Баяжуулсан нүүрсний нийлүүлэлт, түгээлтийг тогтвортой байлгах ажлыг “Тавантолгой түлш” ХХК хариуцаж, “Энержи Ресурс”-ийн шигшсэн мидлинг нийлүүлнэ. Өнөөдрийн байдлаар Шүүхийн шийдвэр гүйцэтгэх газар, Зэвсэгт хүчний жанжин штаб болон нийслэлд зуух хэрэглэдэг 112 төрийн байгууллага манлайлж, мидлинг рүү шилжиж байна” гэлээ.

Мөн 27 зуухыг хийн түлшинд шилжүүлэх ажлыг эхлүүлсэн бөгөөд есдүгээр сарын 15-наас өмнө дуусгахаар төлөвлөсөн байна. Үүнтэй зэрэгцэн уурын зуухнуудад технологийн үнэлгээ хийж, үе шаттайгаар баяжуулсан түлшинд бүрэн шилжүүлэх ажлыг хэрэгжүүлж байгаа аж.