Аж үйлдвэр, эрдэс баялгийн сайд Г.Дамдинням Газрын тос боловсруулах үйлдвэр дээр ажиллаж, Энэтхэгийн онц бөгөөд бүрэн эрхт элчин сайд Атул Малхари Готсурветэй санал солилцжээ.

Тэрээр үйлдвэр ашиглалтад орсноор Монгол Улс газрын тосны бүтээгдэхүүний нийт хэрэгцээний 53–70 хувийг дотоодоос хангах боломжтой. Энэ нь Монгол Улсын эдийн засгийн бие даасан хөгжилд шийдвэрлэх ач холбогдолтой гэдгийг Аж үйлдвэр, эрдэс баялгийн сайд Г.Дамдинням хэллээ.

Манай улсын газрын тосны бүтээгдэхүүний хэрэглээ өнөөдөр 100 хувь гадаад зах зээлээс хамааралтай байна. Энэхүү хараат байдлыг бууруулж, эдийн засгийн дархлааг бэхжүүлэх нь Газрын тос боловсруулах үйлдвэрийн гол зорилго. 2024 онд бид 1.8 тэрбум ам долларыг зөвхөн шатахуунд зарцуулсан тооцоо байна.

Энэ валютын урсгалын 50 хувийг бид дотооддоо барьж чадвал, өөр зүйлд хөрөнгө оруулах боломж нээгдэж тэр хэмжээгээрээ инфляци, валютын ханш тогтворжино" хэмээн онцоллоо. 

Газрын тос боловсруулах үйлдвэрийн бүтээн байгуулалт 4 багц ажлаас бүрдэж байна. Эхний багц ажлыг 2024 онд улсын комисст хүлээлгэн өгснөөр барилга обьектуудыг дэд бүтцийг зориулалтын дагуу ашиглаж байгаа аж.  Харин 2, 3-р багцын инженерчлэл, худалдан авалт, барилга угсралтын ажил төлөвлөгөөний дагуу хэвийн үргэлжилж газрын тос дамжуулах хоолойн бүтээн байгуулалтын ажил 86.4 хувьтай үргэлжилж байна.