Эрдэнэс Таван толгой хувьцаат компанийн Бүрэн эрхт төлөөлөгчөөр томилогдон ажиллаж байсан Сангийн яамны Төрийн нарийн бичгийн дарга Ж.Ганбат тус компаниас 1.2 тэрбум төгрөгийн урамшуулал авсан гэх мэдээлэл хэвлэлүүдэд цацагдсан. Энэ талаар сэтгүүлчид одоо Сангийн яамны Төрийн нарийн бичгийн даргаар ажиллаж буй Ж.Ганбатаас өөрөөс нь асууж тодруулсан юм.

-Таныг ЭТТ ХК-иас өндөр дүнтэй урамшуулал авсан шүүмжилж байна. Үүнд тайлбар өгнө үү?
-Намайг ажлаа хүлээлгэн өгснөөс хойш компанийн хагас жилийн санхүүгийн тайлан гарч, 3.3 их наяд төгрөгийн ашигтай ажилласан дүгнэлт гарсан юм байна.

ТУЗ болон хувьцаа эзэмшигч толгой компанийн удирдлагууд хуралдаад онцгой дэглэмийн хугацаанд ажилласан ажлыг дүгнэсэн юм билээ. Тэр хуралд би оролцоогүй. Надад урамшуулал өгөөч гэсэн хүсэлтийг албан болон албан бусаар тавиагүй.
ТУЗ-ийн хурлаар төрийн өмчит бүх компанийн бүтэн жилийн ажлыг дүгнээд, тодорхой хэмжээний урамшуулал олгодог. Тэр хүрээндээ яригдаж, шийдэгдсэн асуудал. Гэхдээ хэвлэлүүд мэдээлсэн шиг 1.2 тэрбумын урамшуулал өгөөгүй.

-Тэгвэл хэдэн төгрөгийн урамшуулал өгсөн бэ?
-Нэг жил долоо, найман сарын ажлыг дүгнэж, урамшуулал өгсөн. 400 орчим сая төгрөгийн урамшуулал өгсөн. Бусад төрийн өмчит компанийн удирдлагуудын жишгийн дагуу өгсөн юм билээ. Харин өгдөг журмаараа, ашгийн дүнд тооцож өгвөл арай өөр тоо гарах байсан байх гэжээ.