АНУ болон Украины талууд ашигт малтмалын гэрээний нөхцөлүүдийг харилцан зөвшөөрсөн хэмээн албан эх сурвалжууд мэдээлжээ. 

АНУ-ын ерөнхийлөгч Дональд Трамп сэтгүүлчдэд мэдээлэхдээ Украины ерөнхийлөгч Володимир Зеленський баасан гарагт Вашингтонд очиж, "маш том гэрээ" байгуулах хүсэлтэй байгаа гэсэн.

Түүнчлэн дайныг зогсоох гэрээ байгуулбал Украинд энхийг сахиулах хүчин хэрэгтэй ч НАТО-ийн цэргүүдийг Украинд оруулахыг хүлээн зөвшөөрөхгүй гэсэн байна.

Дайны гурван жилийн хугацаанд Вашингтон Киевд тусалж байсны хариуд газрын ховор элемент авах хүсэлтэй байгааг Трамп өмнө нь мэдэгдэж байв.

Энэ талаар Трамп “Одоо бид аюулгүй байхыг хүсэж байна. Америкийн татвар төлөгчдийн мөнгийг буцааж авах ёстой” гэжээ.

Зеленський өмнө нь Вашингтоны санал болгосон ашигт малтмалын гэрээний нөхцөлийн эхний хувилбарыг зөвшөөрөөгүй. Тус гэрээгээр АНУ Украинаас 500 тэрбум ам.доллар бүхий байгалийн баялгийг авах байсан.

Гэхдээ Киевийн зүгээс АНУ-аас тийм их хэмжээний тусламж аваагүй хэмээн шүүмжилсэн юм.  

Үүний хариуд Украин юу авах талаар Трампаас асуухад “Украин аль хэдийнэ АНУ-аас 350 тэрбум ам.долларын тусламж, цэргийн тоног төхөөрөмж зэргийг авсан” гэжээ.

Мөн ОХУ-тай тохиролцоонд хүртэл АНУ Украинд зэвсэг нийлүүлж магадгүй гэсэн юм.

Эх сурвалж: Reuters