Хотын дэд бүтцийн хөгжилд хоёр талын хамтын ажиллагааг бүрдүүлэх Засгийн газрын ажлын хэсэг Их Британид айлчилжээ.

Зам тээврийн сайд Б.Дэлгэрсайханаар ахлуулсан Монгол Улсын хотын дэд бүтцийн бүтээн байгуулалтад хоёр талын хамтын ажиллагааг бүрдүүлэх зорилго бүхий ажлын хэсэг ИБУИНХУ-д 2024 оны 12 дугаар сарын 9-11 өдрүүдэд ажлын айлчлал хийлээ.   

Айлчлалын бүрэлдэхүүнд Монгол Улсын сайд, “Хорин минутын хот Үндэсний хороо”-ны дарга Б.Эрдэнэбүрэн, Нийслэлийн засаг дарга бөгөөд Улаанбаатар хотын захирагч Х.Нямбаатар болон холбогдох байгууллагуудын албан хаагчид оролцлоо. 

 
Төлөөлөгчид айлчлалын эхний өдөр Кроссрэйл компанийн захирал, мэргэжилтнүүдтэй уулзаж, тус байгууллагын Элизабет шугамын бүтээн байгуулалтыг явцад олж авсан туршлагын талаар хэлэлцүүлэг өрнүүлж, айлчлалын хоёр дахь өдөр Элизабет шугамын хүрээнд хийгдсэн бүтээн байгуулалттай газар дээр нь танилцлаа. Түүнчлэн, айлчлалын бүрэлдэхүүн Британийн Бизнес, худалдааны яам, Экспортын санхүүжилтийн агентлаг, төмөр замын салбарт үйл ажиллагаа явуулдаг бизнесийн байгууллагуудтай уулзаж  Экспортын санхүүжилтийн агентлагийн санхүүжилтийг ашиглах болон Улаанбаатар хотын дэд бүтцийн төслүүдэд Британийн бизнесийн байгууллагуудын оролцоог хангах боломжийн талаар хэлэлцсэн.

Айлчлалын явцад хоёр талын цаашдын хамтын ажиллагааны чиглэлээр Монгол Улсын Зам тээврийн яам, Британийн Тээврийн яам, Кроссрэйл компанийн хооронд байгуулах “Монгол Улс дахь хотын төмөр замын салбарт хамтран ажиллах тухай харилцан ойлголцлын санамж бичиг”, Нийслэлийн Засаг даргын тамгын газар, Кроссрэйл компанийн хооронд байгуулах “Нийслэл Улаанбаатар хотын дэд бүтцийн хөгжил” харилцан ойлголцлын санамж бичигт тус тус гарын үсэг зурлаа.