Озэки Хошорюү Сугаррагчаагийн Бямбасүрэн шинэ оны эхний башёд түрүүлж сүмогийн хамгийн дээд цол болох ёкозүна цолд дэвшлээ.

Тэрбээр "Би одоо ч зүүдэлж байгаа мэт санагдаж байна. Үнэхээр итгэж чадахгүй л байна" гэж даваа гарагт Токиогийн Тайто дүүрэг дэх Тацүнами дэвжээнд болсон уламжлалт аваргын хэвлэлийн бага хурал дээр хэлжээ.

25 настай бөх С.Бямбасүрэнд ёкозүна цол олгох эсэхийг Японы Сүмогийн Холбоонд зөвлөмж өгдөг Ёкозүнагийн Зөвлөлөөс шийдвэрлэх нь өдрийн сүүл хүртэл хүлээлттэй байсан юм.

Би багаасаа ёкозүнагийн барилдааныг харж өссөн.

Холбоо уг зөвлөмжийг уламжлал ёсоор хүлээн зөвшөөрдөг бөгөөд энэ тухай албан ёсоор лхагва гарагт эрэмбийн хороо болон захирлуудын зөвлөлийн хурлын үеэр зарлах юм. Ингэснээр Хошорюү нь сүмогийн түүхэн дэх 74 дэх,  Монголын 6 дахь  ёкозүна болж байна.

"Би сайн унтаж амарсан ч үнэндээ их ядарч байна. Тэмцээн дууссаныг ухаарах мөчид миний бүх бие өвдсөн" гэж Хошорюү хэвлэлийн бага хурал дээр хэлэв.

Тэрбээр тэмцээний ес дэх өдөр гэхэд гурван ялагдал хүлээгээд байсан ч тэмцэж, сүүлийн өдөр Маэгашира 14 Кинбозан тэргүүлэгчээс нэг даваагаар хоцорч, түрүүлэх боломжоо хадгалж үлдсэн.

Сонирхуулахад Хошорюү, 25 удаагийн аварга асан ёкозүна Асашорюү Дагвардоржийн ахын хүү буюу зээ дүү бөгөөд хамгийн дээд цолны сүр хүчийн талаарх яриандаа “Би багаасаа ёкозүнагийн барилдааныг харж өссөн. Сүмод орсныхоо дараа ёкозүна гэж ямар агуу хүн байдгийг улам ихээр ойлгосон” гэжээ.

Эх сурвалж: Japan News