-Өнгөрч буй долоо хоногт болсон онцлох үйл явдлуудаас тоймлон хүргэж байна-

ФИЛИППИН УЛСЫН ГАДААД ХЭРГИЙН САЙД ЭНРИКЕ А.МАНАЛО МОНГОЛД АЙЛЧЛАВ

Гадаад харилцааны сайд Б.Батцэцэгийн урилгаар Бүгд Найрамдах Филиппин Улсын Гадаад хэргийн сайд Энрике А.Манало 2024 оны наймдугаар сарын 3-6-ны өдрүүдэд Монгол Улсад албан ёсны айлчлал хийв. 
Тус айлчлал нь манай хоёр улсын хооронд 1973 онд дипломат харилцаа тогтоосноос хойш Бүгд Найрамдах Филиппин Улсын Гадаад хэргийн сайдын түвшинд Монгол Улсад хэрэгжүүлж буй анхны өндөр түвшний айлчлал болсон юм. 

Айлчлалын үеэр талууд Хамтран ажиллах тухай Монгол Улсын Гадаад харилцааны яам болон Бүгд Найрамдах Филиппин Улсын Гадаад хэргийн яам хоорондын харилцан ойлголцлын санамж бичиг, Спортын салбарт хамтран ажиллах тухай Монгол Улсын Соёл, спорт, аялал жуулчлал, залуучуудын яам болон Бүгд Найрамдах Филиппин Улсын Спортын хороо хоорондын харилцан ойлголцлын санамж бичигт тус тус гарын үсэг зурав.

ЕРӨНХИЙ САЙД Л.ОЮУН-ЭРДЭНЭ ШИНЭ ЗӨВЛӨХҮҮДЭЭ СОНГОВ

Өнгөрч буй долоо хоногт Ерөнхий сайд Л.Оюун-Эрдэнэ шинэ зөвлөхүүдээ сонгов. Түүний зөвлөхүүдийн нэг нь реппер Сексцагаанбогд буюу Б.Гантулга юм.
Энэ талаар Ерөнхий сайдын хэвлэлийн төлөөлөгч Ч.Болортуяа "Б.Гантулга томилогдсон. Албан ёсны тушаал "Ерөнхий сайдын зөвлөх" гэж гардаг. Ингээд Ерөнхий сайдын ажлын алба дотроо ажил, үүргээ хуваарилдаг. Эхний ээлжид залуучуудын асуудал хариуцаж ажиллана гэж ойлгож байна" гэв.

БОЛОВСРОЛЫН ЯАМНААС БАГА АНГИЙН СУРАГЧДЫГ ХАРАНДААГААР БИЧҮҮЛЭХ ЗӨВЛӨМЖ ГАРГАВ

Хүүхэд алдаанаасаа айх бус засаж залруулан суралцах боломжийг бий болгох үүднээс энэ хичээлийн жилээс эхлэн бага ангийн сурагчдын бичгийн хэрэгсэлд харандаа ашиглахыг багш, эцэг эх, асран хамгаалагч нарт зөвлөж байна. Харандаа ашигласнаар хүүхэд буруу бичсэнээ баллуурдан, хялбархан засаж, бие даан суралцаж, хөгжих боломжтой.

6 настай сурагчдын гарын сарвууны хөгжлийн онцлог, олон улсын туршлага, ач холбогдлыг харгалзан үзвэл харандаа нь бичихэд хамгийн тохиромжтой хэрэгсэл юм.
Энэ талаар Боловсролын сайд П.Наранбаяр “Бага сургуулийн хүүхдүүдийг нэгдүгээр ангиас нь эхлээд шууд үзгэн балаар бичүүлдэг. Буруу бичихэд нь алдсан үгэн доогуур нь зуруулаад дахин хуулуулдаг. Энэ бол хүүхдийг шийтгэж байгаа нэг хэлбэр. Алдаа хийх эрхийг нь тэр хүүхдэд олгох ёстой. Хүүхэд алдаанаасаа айдаг биш засдаг, асуудлыг өөрийнхөөрөө шийдвэрлэх боломжуудыг бүрдүүлэхийн төлөө бид ажиллана” хэмээн онцолсон.

УЛААНБААТАР ХОТЫН ЕРӨНХИЙ АРХИТЕКТОРООР Z ҮЕИЙН ТӨЛӨӨЛӨЛ Ч.ТӨГСДЭЛГЭРИЙГ ТОМИЛЛОО

Нийслэлийн Засаг даргын захирамжаар Z үеийн төлөөлөл Чинбатын Төгсдэлгэрийг Улаанбаатар хотын Ерөнхий архитектороор томилсноо хотын дарга Х.Нямбаатар танилцуулав. Ч.Төгсдэлгэр нь “Шинэ Монгол” дунд сургуулийг дүүргэж, Япон улсын Ёкохамагийн үндэсний их сургуульд магистр, докторын зэрэг хамгаалсан. Хот төлөвлөгч, хотын нийтийн тээврийн чиглэлээр мэргэшсэн, судлаач бүсгүй. 

2023 оны зургаадугаар сард Ёкохамагийн их сургуульд Хотын нийтийн тээврийн чиглэлээр докторын зэрэг хамгаалсан. Тэрбээр Нийслэлийн Засаг даргын тамгын газар болон Япон улсын томоохон компаниудад хот байгуулалт, нийтийн тээврийн чиглэлээр ажиллаж байсан туршлагатай.

ДАРХАН АВАРГА Н.БАТСУУРЬ ЧӨЛӨӨТ БӨХИЙН ТАМИРЧИН Д.ОТГОНЖАРГАЛД 2 ӨРӨӨ БАЙР БЭЛЭГЛЭХЭЭР БОЛОВ

Дархан Аварга Н.Батсуурь “Олон улсад Чөлөөт бөхөөр улсынхаа нэрийг өндөрт өргөж яваа Д.Отгонжаргал дүүдээ 2 өрөө байр бэлэглэнэ” хэмээн өөрийн цахим хуудсаар мэдэгдсэн.
Д.Отгонжаргалын наймдугаар сарын 8-ны 00:15 цагт Парис 2024 зуны олимпын чөлөөт бөхийн эмэгтэй -50 кг жингийн хүрэл медалийн төлөө 2024 оны Азийн аваргын мөнгөн медальт Хятадын 25 настай Жичи Фентэй барилдаж 6-4 харьцаагаар ялагдсан. Ингэснээр тавдугаар байр эзэлсэн юм.

ОЛИМПЫН ЭРГЭН ТОЙРОНД:

• Д.Отгонжаргал Хятадын бөхөд ялагдаж 5-р байр эзэллээ
• Б.Хонгорзул Хятадын бөхөд 16-12 харьцаагаар ялагдлаа
• Б.Бат-Эрдэнэ Азербайжаны бөхөд ялагдлаа
• Б.Хулан Токиогийн олимпын медальт Хятадын бөхөд ялагдаж 5-р байр эзэллээ
• М.Лхагвэгэрэл шөвгийн наймд Азербайжаны бөхөд ялагдлаа
• П.Орхон дагаж барилдахаар боллоо

ОНЦЛОХ СУРВАЛЖИЛГА НИЙТЛЭЛҮҮД:

• 207 дугаар байрны иргэдийн асуудлыг ТӨР анхаарах үүрэгтэй тул ажлаа хийнэ үү!
• ХААЧИХ ВЭ: Амралтын өдрөөр очоод ирэх, хотод ойр 5 газар
• СУРВАЛЖИЛГА: Улсын сүр цэрэгтээ, цэргийн сүр жагсаалдаа
• Б.Номин: Хувцас, тоглоомоо цэвэрхэн хэрэглээд бусдад шилжүүлэх, солилцох боломжтойг хүүхдэд багаас нь ойлгуулмаар санагддаг
• СУРВАЛЖИЛГА: Сурагчийн дүрэмт хувцас 104-277 мянган төгрөгийн үнэтэй байна

• Эрдэнэт хотыг барьсан барилгын цэргүүд: Бидэнд амралтын өдөр байгаагүй