Израил улсын Ерөнхий сайд Бенжамин Нетаньяаху Газын зурвасын өмнөд хэсэгт орших Рафах хот руу дайралт хийнэ гэдгээ мэдэгдэв. Тус хотод одоогоор сая гаруй палестин иргэн түр орогнож байгаа юм.

Талуудын хооронд гал зогсоох хэлэлцээ үргэлжилж буй ч Израилын Ерөнхий сайд хэлэлцээтэй хэлэлцээгүй Рафах хот руу довтолно гэв.

Тэрбээр Хамас бүлэглэлийг бүрэн устгатал дайн дуусахгүй гэдгийг удаа дараа хэлсэн.

Өнгөрсөн сарын эхээр Израил Хан Юнис хотоос цэргүүдээ татаж, палестинчууд дөрвөн сарын дараа гэртээ харих боломжтой болсон ч бөмбөгдөлтийн улмаас барилгууд сүйдэж, амьдрах аргагүй болсон талаар иргэд ярьж байв.

Харин АНУ-аас "Энгийн иргэдийг хамгаалах найдвартай төлөвлөгөөгүйгээр Рафах хотод том хэмжээний довтолгоо хийхийг дэмжихгүй" гэдгээ мэдэгдсэн юм.

НҮБ-ийн Ерөнхий нарийн бичгийн дарга Антонио Гуттереш ч мөн Израилыг "Энгийн иргэдийг хөнөөж, олон зуун мянган хүнийг дүрвэхэд хүргэх" цэргийн дайралт хийхгүй байхыг уриалав.

Эх сурвалж: Aljazeera