Засгийн газрын 2026, 2028 онд хугацаа нь дуусах бондуудын ханш огцом өсөв.

Монгол Улсын Засгийн газар шинэ бонд гаргахаар төлөвлөж байгааг “Bloomberg”-ийн сэтгүүлч Амея Карве мэдэгдсэнийг Сангийн яамнаас баталгаажууллаа. Энэхүү мэдээллийн дараа Монгол Улсын Засгийн газрын 2026 болон 2028 онд хугацаа нь дуусах бондуудын ханш огцом өссөн үзүүлэлттэй байна.

Шинээр гаргахаар төлөвлөж буй бондыг “S&P Global Ratings” болон “Fitch Ratings” агентлаг “B+”, төлөвийг “Тогтвортой” гэж үнэлжээ. Харин “Moody's” агентлаг “B2” гэж үнэлж, төлөвийг “Тогтвортой” гэж үнэлсэн байна.

Хоёрдугаар сарын 10-ны өдрөөс олон улсын хөрөнгө оруулагчдад тус бондыг санал болгож эхлэхээр байгаа аж. Бондын хэлцлийг “Credit Agricole”, “Deutsche Bank”, “HSBC” болон “JPMorgan” банк гүйцэтгэхээр болжээ.

Үүнээс гадна гадаад өрийн удирдлагын хүрээнд Засгийн газрын зүгээс 2026 он болон 2028 онд хугацаа нь дуусах тав болон 8.6 хувийн хүүтэй бондоо эргүүлэн худалдан авах тендер санал зарлаж байгаа юм байна. Шинэ бонд гаргаж босгосон хөрөнгөөрөө эргүүлэн худалдан авахаар төлөвлөжээ.