Нийслэлийн Засаг дарга бөгөөд Улаанбаатар хотын Захирагч Х.Нямбаатар Бүгд Найрамдах Социалист Вьетнам Улсын “Рокс” группийн удирдах зөвлөлийн дарга, MSB банкны ТУЗ-ийн дарга Тран Ан Туан тэргүүтэй төлөөлөгчдийг хүлээн авч уулзлаа. 

Хотын дарга “Манай хоёр улс сүүлийн жилүүдэд улс төр, батлан хамгаалах, худалдаа, эдийн засаг, аялал жуулчлал, хөдөө аж ахуйн салбарын хамтын ажиллагааны чиглэлээр харилцаагаа өргөжүүлж байна. Цаашид Улаанбаатар хоттой илүү нягт хамтран ажиллах боломжтой” гэжээ.

БНСВУ-ын “Рокс” группийн удирдах зөвлөлийн дарга, MSB банкны ТУЗ-ийн дарга Тран Ан Туан сонирхож буй төсөл, хөтөлбөрүүдийнхээ талаар тодруулж, цаашид хоёр талын хамтын ажиллагааг бэхжүүлэхэд бүх талаар дэмжин, хамтран ажиллахдаа таатай байх болно гэжээ.

ROX группийн хувьд үл хөдлөх хөрөнгө, сэргээгдэх эрчим хүч, банк санхүү, иргэдэд мэдээлэл технологийн чиглэлээр үйлчилгээ үзүүлдэг томоохон групп юм.

“Рокс” групп нь хот, аж үйлдвэрийн паркийн хөгжил, менежмент, үл хөдлөх хөрөнгийн түрээс, худалдаа үйлчилгээ, зочид буудал, эрчим хүч, банк санхүүгийн чиглэлд үйл ажиллагаа явуулдаг Вьетнамын тэргүүлэгч корпорацуудын нэг юм.

Бүгд Найрамдах Социалист Вьетнам улсын барилгын салбарын бизнес эрхлэгчдийн төлөөлөл хоёрдугаар сарын 6-ны өдөр “Улаанбаатар орон сууцжуулалт” ХХК-ийн үйл ажиллагаатай танилцжээ.

Уулзалтаар “Улаанбаатар орон сууцжуулалт” ХХК-ийн хэрэгжүүлэх төслийн танилцуулга, “Hunnu smart city” болон Сэлбэ дэд төвийг түшиглэсэн орон сууцны төлөвлөлтийн талаар мэдээлсэн байна. 

ROX группийн хувьд үл хөдлөх хөрөнгө, сэргээгдэх эрчим хүч, банк санхүү, иргэдэд мэдээлэл технологийн чиглэлээр үйлчилгээ үзүүлдэг томоохон групп юм. Англи, Франц гээд дэлхийн олон оронд зочид буудал, банк санхүү, үл хөдлөхийн хөрөнгө оруулалтыг хийсэн төдийгүй 400 гаруй төслийг хэрэгжүүлжээ. Хамгийн сүүлд, Киргизстанд хоёр тэрбум ам.долларын хөрөнгө оруулжээ. 

БНСВУ-ын “Рокс” группийн удирдах зөвлөлийн дарга, MSB банкны ТУЗ-ийн дарга Тран Ан Туан:

-Манай хоёр орон 70 гаруй жилийн хамтын ажиллагаатай. Хамтын ажиллагааны хүрээнд бизнесийн таатай орчин бүрдэж байгаа гэж харж байгаа. Хоёр улсын бизнес эрхлэгчид туршлага судлах, хамтран ажиллах ажлууд эрчимжсээр байна.

“Улаанбаатар орон сууцжуулалт” ХХК-ийн үйл ажиллагаатай танилцаж, Монгол Улсын барилгажилт, бүтээн байгуулалтын өнөөгийн нөхцөл байдалтай танилцаж байгаадаа тун таатай байна. Бид бүхэн хоёр баг бүрэлдэхүүн болж Монгол Улсад хүрэлцэн ирсэн.

Үлдсэн баг маань өнөөдөр Монгол Улсын эрчим хүчний сайдтай уулзаж байна. Бид Монголд эрчим хүчний шийдэл болж чадах сэргээгдэх эрчим хүчний төслийг танилцуулна. Сэргээгдэх эрчим хүчний технологийг ашигласнаар агаар, орчны бохирдлыг бууруулахаас гадна, иргэддээ илүү ээлтэй, ногоон хот болох боломжтой. Нарны цахилгаан станцын хөрөнгө оруулалтын төслийг хэрэгжүүлбэл Улаанбаатар хот тэр чигтээ эрчим хүчний асуудлаа шийдвэрлэж чадна гэжээ.