Ерөнхий сайд Л.Оюун-Эрдэнэ нийслэлийн хэмжээнд засаг захиргаа, нутаг дэвсгэрийн нэгж, төрийн болон нутгийн захиргааны байгууллагыг өндөржүүлсэн бэлэн байдлын зэрэгт шилжүүлсэнтэй холбогдуулан баяр, амралтын өдрүүдэд Засгийн газрын гишүүдийг бэлэн байдалд ажиллахыг үүрэг болгосон.

Энэ хүрээнд Эрчим хүчний сайд Б.Чойжилсүрэн өчигдөр Бөөрөлжүүтийн цахилгаан станцад ажиллалаа. “Бөөрөлжүүтийн 600 МВт-ын цахилгаан станцын эхний хэсэг төвийн бүсийн эрчим хүчний системд холбогдож, эрчим хүч нийлүүлж эхэллээ.

Эрчим хүчний сайд Б.Чойжилсүрэн, 2024-2025 оны эрчим хүчний өвлийн оргил ачаалал эхэлсэн Монголын эрчим хүчний салбар өндөржүүлсэн бэлэн байдалд ажиллаж байна. Өнөөдрийн байдлаар бүх цахилгаан станцуудад зуух, генераторууд бүрэн ажиллаж байна. Бөөрөлжүүтийн цахилгаан станцын эхний 150 МВт-ын блокийг ашиглалтад оруулахаар туршилт, тохируулгын ажил үргэлжилж байна. 

Хувийн хөрөнгө оруулалттай энэ станц өнөөдрөөс эхлэх оргил ачаалалд оролцож эхэлсэн. 2025 оны 1-р сарын 6-наас 150МВт-ын бүрэн хүчин чадлаараа төвийн эрчим хүчний нэгдсэн сүлжээнд холбогдоно. Энэ станц бүрэн хүчин чадлаар ажиллаж эхэлснээр сүүлийн өдрүүдэд хийж байсан эрчим хүчний хязгаарлалт ерөнхийдөө зогсох болов уу гэсэн найдлага, хүлээлттэй байна.

Сүүлийн жилүүдэд манай улсын эдийн засаг өсөхийн хэрээр оргил ачааллын үед чадлын хувьд 12 хувиар, энергийн хувьд 7 хувиар өсөж байна. Энэ дутагдлыг нөхөхөд “Бодь интернэшнл” группийн байгуулсан Бөөрөлжүүтийн станц үнэлж баршгүй хувь нэмэр оруулж байна.

-ОХУ-аас ямар хэмжээний эрчим хүч импортолж байна вэ?
-Оргил ачааллын үед ОХУ-аас 245 МВт-ын эрчим хүч авч байсан бол одоо оргил ачаалал гэхгүй, өдөр шөнөгүй авч байна. Бөөрөлжүүтийн станцын хоёрдугаар блокийг 150 МВт 2025 оны 12-р сарын 1-нээс өмнө ашиглалтад оруулахаар төлөвлөн ажиллаж байна. 3, 4-р блокийг 2027, 2028 онд ашиглалтад оруулна. Ингэснээр 600 МВт-ын хүчин чадлаар ажиллаж эхлэх юм гэлээ.