Л.Оюун-Эрдэнийн танхимын сайд нарын БОЛОВСРОЛ, НАМТАР

32 дахь Ерөнхий сайд Л.Оюун-Эрдэнэ танхимын бүрэлдэхүүнээ УИХ-ын чуулганд танилцуулж, Шинэ Засгийн газар албан ёсоор ажилдаа орлоо.

Шинэ Засгийн газрын бүрэлдэхүүнд өмнөх Засгийн газарт ажиллаж байсан сайд нараас найм нь үүрэгт ажлаа үргэлжлүүлэх бол шинээр найман хүн сайдын суудалд суухаар болоод байна.

Харин давхар дээлтэй буюу УИХ-ын гишүүн дөрвөн сайд байгаа юм. Тодруулбал, УИХ-ын гишүүн С.Амарсайхан Шадар сайдын үүрэг гүйцэтгэх бол Х.Нямбаатар хариуцсан салбартаа үлдэж, эдийн засагч гишүүн Б.Жавхлан Сангийн яамыг, УИХ-ын гишүүн Л.Энх-Амгалан Боловсрол, шинжлэх ухааны салбарыг толгойлохоор боллоо. 

ШАДАР САЙД, УОК-ЫН ДАРГААР ДАВХАР ДЭЭЛТЭЙ ХҮНИЙГ ТОМИЛОХГҮЙ БАЙХ ГЭСЭН ХҮЛЭЭЛТ БАЙСАН Ч ЭСРЭГЭЭРЭЭ БОЛОВ

УИХ-ын гишүүн С.Амарсайхан Шадар сайдаар ажиллахаар боллоо. Нийслэл хотын удирдаж явсан түүний хувьд Шадар сайдын үүргийг нуруундаа үүрэх чадалтай нэгэн гэж МАН-ын УЗ үзсэн бололтой. Цар тахлын нөхцөл байдал хүндхэн байгаа энэ үед Шадар сайд, УОК-ын даргаар давхар дээлтэй хүнийг томилохгүй байх гэсэн хүлээлт байсан ч эсрэгээрээ байв. Англи, Орос, Хятад хэлтэй түүний боловсрол, ажилласан байдлыг танилцуулж байна. Тэрбээр улсад 23, төрийн албанд 15 жил ажилласан туршлагатай болохыг танилцуулгад дурджээ. 

БОЛОВСРОЛ:

• 1991 онд Эрдмийн оргил дунд сургууль
• 1996 онд АНУ, Калифорни муж, Пресно хотын институт
• 2000 онд АНУ, Соут Вест их сургууль, эрх зүйч, магистр

АЖИЛЛАСАН БАЙДАЛ:

• 1992-1994 онд Шинжлэх ухаан, мэдээлэл технологийн төв, ажилтан
• 2000-2004 онд Монгол Улсаас БНХАУ-д суугаа Элчин сайдын яам, Консулын ажилтан, атташе
• 2004-2007 онд АНУ, “American Trade and Development” ХХК, хөрөнгө оруулалт, гадаад худалдааны менежер
• 2007-2010 онд “Оюуны ундраа” ХХК, гүйцэтгэх захирал
• 2010-2017 онд “Оюуны ундраа” группийн ерөнхийлөгч
• 2016-2017 онд Нийслэлийн төсөв, санхүү, эдийн засгийн хорооны дарга
• 2019 онд Нийслэлийн иргэдийн Төлөөлөгчдийн Хурлын дарга
• 2019-2020 онд Нийслэлийн Засаг дарга бөгөөд Улаанбаатар хотын захирагч
• 2020 оноос Монгол Улсын Их Хурлын гишүүн

ШИНЭ ЗАСГИЙН “ГАЛ ТОГОО”-Г Ц.НЯМДОРЖ БАРИНА

УИХ-ын гишүүн асан, Хууль зүй, дотоод хэргийн сайд асан Ц.Нямдорж энэ удаад 32 дахь Ерөнхий сайдын удирдах танхимын “гал тогоо баригч" буюу Засгийн газрын хэрэг эрхлэх газрын даргаар ажиллахаар болоод байна. 

БОЛОВСРОЛ:

• 1975 онд Увс аймгийн Улаангом хотын 10 жилийн 1 дүгээр дунд сургууль
• 1981 онд ЗХУ-ын Ленинград хотын Улсын Их Сургууль Хуульч мэргэжлээр тус тус төгссөн.

АЖИЛЛАСАН БАЙДАЛ:

• 1981-1988 онд Улсын ерөнхий прокурорын газарт хэлтсийн прокурор, хэлтэс, тасгийн дарга
• 1988-1990 онд Цэргийн ерөнхий прокурорын нэгдүгээр орлогч
• 1990-1992 онд Монгол Улсын Хууль зүйн тэргүүн дэд сайд
• 1990 онд БНМАУ-ын Сайд нарын зөвлөлд мэргэжилтэн
• 1992-1996 онд Монгол Улсын Их Хурлын гишүүн
• 1996-2000 онд Монгол Улсын Их Хурлын гишүүн
• 2000-2004 онд Монгол Улсын Засгийн газрын гишүүн, Хууль зүй, дотоод хэргийн сайд
• 2000-2004 онд Монгол Улсын Их Хурлын гишүүн
• 2004-2008 онд Монгол Улсын Их Хурлын гишүүн
• 2005-2007 онд Монгол Улсын Их Хурлын дарга
• 2008-2012 онд Монгол Улсын Засгийн газрын гишүүн, Хууль зүй, дотоод хэргийн сайд
• 2008-2012 онд Монгол Улсын Их Хурлын гишүүн
• 2012-2016 онд Монгол Улсын Их Хурлын гишүүн
• 2016 оноос Монгол Улсын Их Хурлын гишүүн
• 2016-2017 онд Монгол улсын их хурлын дэд дарга
• 2017 оноос Монгол Улсын Засгийн газрын гишүүн, Хууль зүй, дотоод хэргийн сайд

ЭДИЙН ЗАСАГЧ ГИШҮҮН САНГИЙН САЙД БОЛЛОО

УИХ-ын гишүүн Б.Жавхлан Сангийн сайдаар ажиллахаар боллоо. Ч.Хүрэлбаатарыг сайдаар үлдэнэ, Х.Булгантуяа ч магадлалтай хэмээн яригдаж байсан ч эцэст нь Б.Жавхлан давхар дээл өмсөв. Монголбанкнаас ажлын гараагаа эхэлж, ХААН, ХХБ-аар "овоглож" явсан гишүүний боловсрол, ажилласан байдлыг танилцуулж байна.

БОЛОВСРОЛ:

• 1990 онд Дархан хотын 17 дугаар дунд сургууль
• 1992 онд Сүхбаатар аймгийн 1 дүгээр дунд сургууль
• 1997 онд Монгол улсын их сургууль, Эдийн засгийн сургууль, банкны эдийн засагч
• 2008 онд АНУ, Калифорнийн их сургуулийн Риверсайдын хэлний сургууль
• 2009 онд АНУ, Индианагийн их сургууль

АЖИЛЛАСАН БАЙДАЛ:

• 1997-1999 онд Монголбанк, Хяналт шалгалтын газрын хянан шалгагч
• 1999-2000 онд Монголбанкнаас ХААН банкинд Бүрэн эрхт төлөөлөгч, эрх хүлээн авагч
• 2000-2004 онд Монголбанк, Хяналт шалгалтын газрын ахлах хянан шалгагч
• 2004-2006 онд Худалдаа хөгжлийн банк, Үйл ажиллагаа эрхэлсэн захирал
• 2006-2007 онд Худалдаа хөгжлийн банк, Дэд ерөнхийлөгч
• 2010-2016 онд Монголбанкны Тэргүүн дэд ерөнхийлөгч
• 2016-2020 онд Монгол Улсын Их Хурлын гишүүн
• 2016-2020 онд Нутгийн удирдлагын дэд хорооны дарга
• 2020 оноос Монгол Улсын Их Хурлын гишүүн
• 2020 оноос Монгол Улсын Их Хурлын Төсвийн байнгын хорооны дарга

ДЭД САЙДААС САЙДЫН СУУДАЛД

Гадаад харилцааны дэд сайдаар ажиллаж байсан Б.Батцэцэг салбараа толгойлохоор боллоо. Түүний хувьд 2020 оны УИХ-ын сонгуульд Баянхонгор аймагт хүч үзсэн ч гишүүн болж чадаагүй. Шинэ Засгийн газрын бүтцэд өөрчлөлт оруулахгүй хэмээн УИХ дахь МАН-ын бүлгийн дарга Д.Тогтохсүрэн мэдээлж байсан. Гэвч Гадаад харилцааны дэд сайд сайд болон дэвшсэн тул түүнийг орлох хүнийг томилохоор болж байна. 

БОЛОВСРОЛ:

• МУИС-ийн Олон Улсын Харилцааны Дээд Сургууль,
• Санхүү Эдийн Засгийн Дээд Сургууль
,
• Голландын Маастрихтийн Менежментийн Их Сургууль

АЖИЛЛАСАН БАЙДАЛ:

• 1996-2005 онд “Мөнхийн үсэг” ХХК-ийн Ерөнхий захирал
• 2005-2007 онд Гадаадын хөрөнгө оруулалт, гадаад худалдааны агентлагийн Гадаад сурталчилгаа хамтын ажиллагааны хэлтсийн дарга
• 2007-2015 онд “Мөнхийн үсэг групп” ХХК-ийн Удирдах зөвлөлийн дарга
• 2010-2011 онд Монгол Ардын Намын Ерөнхий нарийн бичгийн даргын зөвлөх
• 2011-2012 онд Монгол Ардын Намын Гадаад харилцаа, хамтын ажиллагааны хэлтсийн дарга
• 2015-2016 онд Монгол Улсын Сангийн сайдын гадаад бодлогын зөвлөх
• 2016 оноос Гадаад харилцааны дэд сайдаар томилогдон ажиллаж байна

УЛИРАН ТОМИЛОГДСОН Г.САЙХАНБАЯР 

Улиран томилогдож буй найман сайдын нэг нь Г.Сайханбаяр. Өнгөрсөн долдугаар сараас эхлэн Батлан хамгаалахын салбарыг хариуцан ажиллаж  буй түүнийг ажлаа үргэлжлүүлэх нь зүйтэй гэж үзжээ. Г.Сайханбаяр улс төр судлаач, цэргийн стратегич, төрийн удирдлагын мэргэжилтэй, магистр зэрэгтэй. 1968 онд Улаанбаатар хотод төрсөн. 52 настай. Үндэс угсаа Халх. Ам бүл 3.

БОЛОВСРОЛ

• 1985 онд нийслэлийн 53 дугаар дунд сургууль
• 1989 онд Цэргийн нэгдсэн дээд сургууль
• 1995 онд Засгийн газрын дэргэдэх Төрийн захиргаа удирдлагын хөгжлийн институт
• 2002 онд БНХАУ-ын Үндэсний батлан хамгаалахын их сургууль
• 2014 онд ОХУ-ын Зэвсэгт хүчний жанжин штабын академийг тус тус суралцаж төгссөн.

АЖИЛЛАСАН БАЙДАЛ

• 1989-1994 онд Ардын армийн 121, 318 дугаар ангиудад салбарын улс төрийн орлогч, суртал нэвтрүүлэгч
• 1994-2000 онд Зэвсэгт хүчний ерөнхий штабын Сургалт, соёл сурталчилгаа, хүмүүжлийн газарт мэргэжилтэн офицер, Мэдээлэл, соёл сурталчилгаа, хүмүүжлийн ажлын хэлтсийн дарга
• 2000-2012 онд Батлан хамгаалах яамны Төрийн захиргааны удирдлагын газрын орлогч дарга, дарга
• 2014 оноос Батлан хамгаалах яамны Стратегийн бодлого, төлөвлөлтийн газрын даргын албан үүргийг түр орлон гүйцэтгэгч, дарга
• 2020 оноос Батлан хамгаалахын сайдаар ажиллаж байна.

БАРИЛГА, ХОТ БАЙГУУЛАЛТЫН САЙДААР БЭГЖАВЫН МӨНХБААТАР 

Хими технологич, улс төр судлаач, эрх зүйч мэргэжилтэй. Бизнесийн удирдлагын магистр зэрэгтэй Б.Мөнхбаатар У.Хүрэлсүхийн Засгийн газраас Л.Оюун-Эрдэнийн Засгийн газарт дамнан ажиллах найман сайдын нэгээр тодорлоо. Тэрбээр 1975 онд Улаанбаатар хотод төрсөн. 45 настай. Үндэс угсаа Халх. Ам бүл 5. Улсад 19 жил, төрийн удирдах албан тушаалд 12 жил ажиллаж байна. 

БОЛОВСРОЛ

• 1992 онд Төв аймгийн 2 дугаар дунд сургууль
• 1996 онд Техникийн их сургууль
• 2001 онд Монгол Улсын их сургуулийн Нийгмийн ухааны факультет
• 2003 онд Монгол Улсын их сургуулийн Хууль зүйн сургууль
• 2006 онд Зүүн Лондонгийн Их сургуулийг тус тус төгссөн.

АЖИЛЛАСАН БАЙДАЛ

• 1998-2001 онд Монголын Ардчилсан Социалист Оюутны холбооны Ерөнхий нарийн бичгийн дарга
• 2001-2002 онд  Нийслэлийн Монгол Ардын Хувьсгалт Намын хорооны улс төрийн ахлах ажилтан
• 2002- 2004 онд Боловсрол, соёл, шинжлэх ухааны яамны Төрийн захиргаа, хамтын ажиллагааны газрын орлогч дарга, Гадаад харилцааны хэлтсийн дарга
• 2006-2008 онд Нийслэлийн Засаг даргын Тамгын газрын  Хотын хөгжлийн бодлогын хэлтсийн дарга
• 2008 онд Баянзүрх дүүргийн Засаг дарга
• 2008-2012 онд Нийслэлийн Засаг даргын Барилга хот байгуулалт, дэд бүтцийн асуудал хариуцсан  орлогч
• 2014-2015 онд  Хүн амын хөгжил, нийгмийн хамгааллын яамны дэд сайд
• 2016-2018 онд “Оюу толгой” ХХК-ийн Төлөөлөн удирдах зөвлөлийн гишүүн
• 2016-2018 онд “Эрдэнэс оюу толгой” ХХК-ийн гүйцэтгэх захирал
• 2019 оноос одоог хүртэл Барилга, хот байгуулалтын дэд сайд
• 2020 оноос Барилга, хот байгуулалтын сайд

СТАТИСТИКЧ САЙД ҮРГЭЛЖЛҮҮЛЭН АЖИЛЛАХААР БОЛЛОО

Удам дамжсан статистикч сайд А.Ариунзаяа улиран томилогдлоо. Тэрбээр улс төрийн шинжлэх ухаан, нийгэм судлалын мэргэжилтэй. Бизнесийн удирдлагын магистр зэрэгтэй. 1980 онд Улаанбаатар хотод төрсөн. Ам бүл 5. Улсад 16 жил ажиллаж байгаа бөгөөд үүний тавд нь төрийн удирдах албанд ажиллаж байна. 

БОЛОВСРОЛ

• 1995 онд Улаанбаатар хотын Орос, Монголын хамтарсан 3 дугаар дунд сургууль
• 1996 онд ОХУ-ын Улан-Үдэ хотын лицей-интернат 1-р сургууль,
• 1999  онд ХБНГУ-ын Халле коллеж
• 2005 онд  ХБНГУ-ын Ханновэр их сургууль
• 2015 онд  Удирдлагын академи, 2017 онд Эдийн засгийн Үндэсний дээд сургуулийг тус тус төгссөн. 

АЖИЛЛАСАН БАЙДАЛ

• 2005-2013 онд “Монгол Даатгал” ХХК-д хүний нөөц, сургалтын менежер, ерөнхий менежер, тэргүүлэх менежер
• 2013-2016 онд Монгол Ардын намын Намын байгуулалт, стратеги төлөвлөлтийн газар болон нийгэм, эдийн засгийн бодлогын газрын даргаар тус тус ажилласан
• 2016-2020 онд хүртэл Үндэсний Статистикийн хорооны дарга
• 2020 оноос Хөдөлмөр, нийгмийн хамгааллын сайдаар ажиллаж байна.

БҮТЭЭН БАЙГУУЛАЛТУУДЫГ ҮРГЭЛЖЛҮҮЛЭХ Л.ХАЛТАР 

Зам тээврийн хөгжлийн сайд Л.Халтар дахин салбараа удирдаж ажиллахаар боллоо. Томоохон бүтээн байгуулалтууд, тэр дундаа олон хүний хүсэн хүлээж буй Дархан-Улаанбаатар чиглэлийн авто замын бүтээн байгуулалтад онцгой анхаарал хандуулан ажилла хэмээн түүнийг улираан томилж буй бололтой. Тэрбээр 1965 онд Ховд аймгийн Дарви суманд төрсөн. Инженер мэргэжилтэй, докторын зэрэгтэй. 55 настай. Ам бүл 4.

БОЛОВСРОЛ

• 1983 онд Улаанбаатар хотын 28 дугаар дунд сургууль
• 1990 онд ОХУ-ын Санктпетербург хотын Төмөр замын дээд сургууль
• 1999 онд ОХУ-ын Санктпетербург хотын Зам харилцааны их сургуулийг тус тус төгссөн.

АЖИЛЛАСАН БАЙДАЛ

• 1983 онд “Улаанбаатар төмөр зам” хувь нийлүүлсэн нийгэмлэгийн Захиргааны хэлтэст цэвэрлэгч
• 1983-1985 онд мөн хувь нийлүүлсэн нийгэмлэгийн Худалдааны баазад ачигч
• 1990-1992 онд “УБТЗ” ХНН-ийн Төмөр замын коллежид багш
• 1992-1993 онд “УБТЗ” ХНН-ийн Ачиж, буулгах ангийн орлогч дарга
• 1993-2006 онд “УБТЗ” ХНН-ийн Тээвэр зуучийн төвд захирал
• 2006-2018 онд “УБТЗ” ХНН-ийн Удирдах газарт орлогч дарга
• 2018-2020 онд хүртэл Зам, тээврийн хөгжлийн дэд сайд
• 2020 оноос Зам, тээврийн хөгжлийн сайд

ЭРЧИМ ХҮЧНИЙ САЙД Н.ТАВИНБЭХ 

Цахилгааны инженер мэргэжилтэй, Бизнесийн ухаан, эрчим хүчний магистр зэрэгтэй Эрчим хүчний салбарыг удирдаж байсан Н.Тавинбэх 32 дахь Ерөнхий сайдын танхимд хамтран ажиллахаар боллоо. 1971 онд төрсөн. 49 настай түүний хувьд долдугаар сард У.Хүрэлсүхийн Засгийн газрын бүрэлдэхүүнд багтан ажилласан юм.

Шинэ коронавирусийн халдвартай холбоотой иргэдийн амьжиргааг дэмжих чиглэлд Засгийн газраас авч хэрэгжүүлсэн арга хэмжээний нэгд цахилгааны үнийг тэглэх асуудал орсон. Үүнтэй холбоотойгоор цахилгаан эрчим хүчний салбар хэсэгтээ л анхаарлын төвд ороод байсан. Тухайн цаг үед салбар удирдаж байсан Н.Тавинбэхийг цаг үеэ мэдэрч сайтар ажилласан хэмээн албан тушаалд нь үлдээж буй бололтой. Мэргэжлийн бас менежерийн ур чадвар сайтай хэмээн үнэлэгдэж, үлдээд буй Н.Тавинбэхийн намтарыг хүргэж байна. 

БОЛОВСРОЛ

• 1989 онд Багануур дүүргийн ерөнхий боловсролын сургууль
• 1994 онд Техникийн их сургууль
• 2005 онд Удирдлагын академи
• 2020 онд Шинжлэх ухаан, технологийн их сургуулийг тус тус төгссөн.

АЖИЛЛАСАН БАЙДАЛ

• 1995-2001 онд Багануурын цахилгаан, шугам сүлжээний газрын Засварын албанд монтёр, мастер, албаны дарга, инженер
• 2001-2007 онд “Багануур зүүн өмнөд бүсийн цахилгаан түгээх сүлжээ” ХК-ийн дэд захирал, ерөнхий инженер
• 2007-2013 онд мөн компанийн гүйцэтгэх захирал
• 2015-2017 онд Багануур хотын захирагч
• 2017-2020 онд “Багануур зүүн өмнөд бүсийн цахилгаан түгээх сүлжээ” ХК-ийн гүйцэтгэх захирал
• 2020 оноос Эрчим хүчний сайд

АСУУДАЛ ТАРЬСАН Ч САЙД ХЭВЭЭР ҮЛДСЭН Г.ЁНДОН

Уул уурхай, хүнд үйлдвэрийн сайд Г.Ёндон хоёр Засгийн газар дамжин сайдаар ажиллаж буй найман хүний нэг боллоо. Мэргэжлийн, мэдлэг боловсролоороо хэний ч дор орохгүй хэдий ч алдаа гаргаж, олон нийтийн анхаарлын төвд орж явсан цаг саяхан. Хүүхдийнх нь сургалтын төлбөр татвар төлөгчдийн мөнгөөр төлөгдсөн болох баримт гарч ирэн, өмнөх ажиллаж байсан байгууллагадаа гэрээний дагуу төлүүлсэн хэмээн тайлбар тавин, төлбөрийг нь буцаасан хэдий ч түүний нэрэнд багахан толбо үлдсэн. Ёс зүйн хариуцлага нэхүүлж явсан тэрбээр дахин сайдаар ажиллахаар болжээ.

Уулын инженер-маркшейдер мэргэжилтэй, Монгол Улсын зөвлөх инженер, докторын зэрэгтэй түүний боловсрол, намтарыг танилцуулж байна. 

БОЛОВСРОЛ

• 1985 онд 75 дугаар сургууль
• 1991 онд ОХУ-ын Иркутск хотын Техникийн их сургуулийг тус тус төгссөн.

АЖИЛЛАСАН БАЙДАЛ

• 1991-1998 онд Уул уурхайн хүрээлэнд эрдэм шинжилгээний ажилтан
• 2002-2007 онд  “Монголросцветмет” ТӨҮГ-ын Бор өндөр уулын баяжуулах үйлдвэрт Хэсгийн маркшейдер, ерөнхий маркшейдэр
• 2007-2009 онд “Монголросцветмет” ТӨҮГ-ын захиргаанд хэлтсийн дарга
• 2009-2013 онд “Монголросцветмет” ТӨҮГ-ын Шижир алт үйлдвэрт захирал
• 2013-2017 онд “Монголросцветмет” ТӨҮГ-ын Баргилт уулын үйлдвэрт ерөнхий инженер
• 2017-2018 онд “Эрдэнэт үйлдвэр” ТӨҮГ-ын Улаанбаатар хот дахь төлөөлөгчийн газрын орлогч дарга
• 2018 оноос одоог хүртэл “Монголросцветмет” ТӨҮГ-ын Үйлдвэрлэл эрхэлсэн орлогч захирал
• 2020 оноос Уул уурхай, хүнд үйлдвэрийн сайд

ЭМНЭЛГИЙН ДАРГААС ЭРҮҮЛ МЭНДИЙН САЙД

Улсын хоёрдугаар төв эмнэлгийн дарга С.Энхболд Эрүүл мэндийн сайдаар ажиллахаар болоод байна. 2004 онд АШУИС-ийг хүний их эмчээр төгссөн. Тэргүүлэх зэргийн эмч, Анагаах Ухааны Доктор, Клиникийн Профессор цолтой. Эрүүл мэндийн салбарт тасралтгүй 17 жил ажиллаж буй. 2007 оноос хойш Улсын Нэгдүгээр Төв эмнэлгийн дүрс оношилгооны төвийн даргаар, 2019 оноос өнөөдрийг хүртэл Улсын Хоёрдугаар Төв эмнэлгийн Ерөнхий захирлаар ажиллаж байна. 

БОЛОВСРОЛ, ШИНЖЛЭХ УХААНЫ САЙД Л.ЭНХ-АМГАЛАН

Давхар дээлтэй дөрвөн сайдын нэгээр УИХ-ын гишүүн Л.Энх-Амгалан тодорлоо. Тэрбээр Л.Цэдэвсүрэнгийн ажлыг авч, Боловсрол, шинжлэх ухааны салбарын бодлогыг зангидахаар болоод байна. Чуулганы танхимд боловсролын асуудлыг хөндөн ярьдаг түүнийг өнгөрсөн жил гаруйн хугацаанд хоцрогдоод буй сурагчдын боловсролын асуудалд анхааран, зөв чиглүүлэн ажиллана гэсэн итгэл хүлээлгэж буй бололтой. Туршлагатай улс төрч, УИХ-ын дэд даргаар ажиллаж явсан түүний боловсролын салбарыг хэрхэн өөрчлөн, дээшлүүлэхийг харах үлдэж байна. 

БОЛОВСРОЛ:

• 1987 онд Хөвсгөл аймгийн Мөрөн хотын 10 жилийн 2 дугаар дунд сургууль
• 1992 онд ОХУ-ын Санкт-Петербургын их сургууль
• 1996 онд АНУ-ын Дакотогийн их сургууль
• 2002 онд БНСУ-ын Хангдоны их сургууль тус тус төгссөн.

АЖИЛЛАСАН БАЙДАЛ:

• 1992-1995 онд МОНЦАМЭ агентлаг, Ил товчоо сонины хариуцлагатай нарийн бичгийн дарга
• 1996 онд Интерпресс ХХК-ийн үүсгэн байгуулагч
• 1996-2012 онд Юнител групп, MCS электроникс ХХК-ийн захирлуудын зөвлөлийн дарга, MCS группын тэргүүн дэд ерөнхийлөгч
• 2012 онд Монгол Улсын ерөнхий сайдын хөдөөгийн бодлого, дэд бүтэц хариуцсан зөвлөх
• 2012-2016 онд Монгол Улсын Их Хурлын гишүүн
• 2012 оноос МАН-ын Удирдах зөвлөлийн гишүүн
• 2016-2020 онд Монгол Улсын Их Хурлын гишүүн
• 2016-2017 онд Монгол Улсын Их Хурлын Нийгмийн бодлого, боловсрол, соёл, шинжлэх ухааны байнгын хорооны дарга
• 2017-2020 онд Монгол Улсын Их Хурлын дэд дарга
• 2020 оноос Монгол Улсын Их Хурлын гишүүн
• 2020 оноос Монгол Улсын Их Хурлын Төрийн байгуулалтын байнгын хорооны дарга

З.МЭНДСАЙХАН ХӨДӨӨ АЖ АХУЙН САЛБАРЫГ ДАХИН УДИРДАНА

У.Хүрэлсүхийн Засгийн газрын огцроход дараагийн Засгийн газарт үлдэж ажиллах нь зүйтэй хэмээн нэрлэгдээд байсан сайд нарын нэг нь З.Мэндсайхан. Түүнийг салбараа үргэлжлүүлэн удирдах нь зүйтэй гэсэн хүмүүс нэлээд байв. 1979 онд төрсөн тэрбээр бизнесийн удирдлагын магистр зэрэгтэй.

Шинэ Засгийн газар шинэ ажлуудыг санаачилж хэрэгжүүлэхээс гадна өмнөх У.Хүрэлсүхийн Засгийн газрын эхлүүлсэн төмөр зам, уул уурхай, газрын тосны үйлдвэр зэрэг олон томоохон бүтээн байгуулалтуудыг үргэлжлүүлэхээ нэгэнт зарласан болохоор өмнөх танхимаас нэр бүхий сайд нарыг улираах нь зөв гэдэг дээр МАН-ын УЗ-ийн гишүүд санал нэгджээ. Тиймээс салбарын сайд нарыг бүгдийг нь шинэ хүмүүсээр бүрдүүлэх гэхээсээ харин дотооддоо цар тахалтай, эдийн засгийн хүндрэл сорилтууд үүсэхээр байгаа ийм эгзэгтэй үед тэнцвэрийг хангах нь чухал гэж үзжээ.   

БОЛОВСРОЛ

• 1996 онд Ховд аймгийн Мянгад сумын ерөнхий боловсролын сургууль
• 2001 онд Санхүү эдийн засгийн дээд сургууль
• 2008 онд Удирдлагын академийг тус тус төгссөн. Эдийн засагч мэргэжилтэй.

АЖИЛЛАСАН БАЙДАЛ

• 2001-2003 онд “Монхангай хаус” ХХК-д хэлтсийн менежер, захирал
• 2003-2004 онд “Дөрвөн Уул” ХХК-д гүйцэтгэх захирал
• 2004-2013 онд “Мээг” ХХК-д гүйцэтгэх захирал
• 2013-2015 онд “МТМ” ХХК-д захирал
• 2015-2016 онд Сангийн яамны Төсвийн хөрөнгө оруулалтын газрын дарга
• 2016-2019 онд Эрчим хүчний яаманд Төрийн нарийн бичгийн дарга
• 2019-2020 онд Төрийн өмчийн бодлого, зохицуулалтын газрын дарга
• 2020 оноос Хүнс, хөдөө аж ахуй, хөнгөн үйлдвэрийн сайд 

ХУУЛЬ ЗҮЙН САЛБАРЫГ ДАХИН УДИРДУУЛАХААР Х.НЯМБААТАРЫГ ТОМИЛОВ

Тэмцэгч таван гишүүний нэг Х.Нямбаатар дахин Хууль зүй, дотоод хэргийн сайдаар томилогдлоо. Эрх зүйч мэргэжилтэй, хууль зүйн ухааны магистр зэрэгтэй түүний хувьд У.Хүрэлсүхийн Засгийн газарт мөн л энэ салбарыг удирдаж байсан. 

БОЛОВСРОЛ

• 1996 онд нийслэлийн 48 дугаар дунд сургууль
• 2000 онд Орхон их сургуулийг
• 2008 онд Хууль сахиулахын их сургуулийг тус тус төгссөн.

АЖИЛЛАСАН БАЙДАЛ

• 2000-2007 онд Орхон их сургуульд багш
• 2005-2008 онд Монголын өмгөөлөгчдийн холбоонд өмгөөлөгч
• 2008-2009 онд Сонгинохайрхан дүүргийн Засаг даргын Тамгын газарт Хуулийн зөвлөх
• 2009-2012 онд Сонгинохайрхан дүүргийн Засаг даргын Тамгын газарт Төрийн захиргаа, удирдлагын хэлтсийн дарга
• 2011-2012 онд мөн дүүргийн Засаг даргын Тамгын газрын даргын үүрэг гүйцэтгэгч
• 2012-2016 онд Сонгинохайрхан дүүргийн иргэдийн Төлөөлөгчдийн Хурлын дарга
• 2016 оноос Улсын Их Хурлын гишүүн
• 2019-2020 онд Улсын Их Хурлын Хууль зүйн байнгын хорооны дарга
• 2020 оноос Хууль зүй, дотоод хэргийн сайд

БАЙГАЛЬ ОРЧИН, АЯЛАЛ ЖУУЛЧЛАЛЫН САЛБАРЫГ УДИРДАХ ДАРААГИЙН СЭТГҮҮЛЧ САЙД Н.УРТНАСАН

Л.Оюун-Эрдэнийн Засгийн газарт ажиллах дөрвөн эмэгтэй сайдын нэг нь Н.Уртнасан. Тэрбээр Байгаль орчин, аялал жуулчлалын салбарыг удирдахаар болоод байна. Сэтгүүлч мэргэжилтэй шинэ сайд 46 настай, Сэлэнгэ аймагт төрсөн. 

БОЛОВСРОЛ:

• 1993 онд Дархан хотын 17 дугаар дунд сургууль,
• 1994-1998 онд МУИС-ийг Сэтгүүл зүй

АЖИЛЛАСАН БАЙДАЛ:

• 1998-2000 онд Eagle TV телевизэд сэтгүүлч, мэдээний албаны дарга,  
• 2000-2010 онд МҮОНРТ-ийн Нийгэм, эдийн засгийн редакцид сэтгүүлч, редактор,  
• 2010-2013 онд “Шинэ дэлхий” телевизийн Гүйцэтгэх захирал,
• 2013 оноос хойш “Юни Си энд Си” ХХК-ийн Маркетингийн захирал,
• 2016 оноос “Юни солар” ХХК-ийн Ерөнхий захирал

ТЕЛЕВИЗИЙН САЛБАРТ АВЧИРСАН ӨӨРЧЛӨЛТИЙГ СОЁЛЫН САЛБАРТ АВЧРАХ УУ

У.Хүрэлсүхийн Засгийн газарт шинээр байгуулсан яамны нэг нь Соёлын яам. Багагүй хэл амтай байгуулагдсан яамны сайдаар Монгол HD  телевизийн захирал Ч.Номин ажиллахаар болжээ. 2011 оноос хойш Монгол HD телевизийн захирлаар ажиллаж буй түүнийг телевизийн салбарт авчирсан өөрчлөлт, шинэчлэлтээ соёлын салбарт авчирна гэж хүлээж буй бололтой. 

БОЛОВСРОЛ  

• Нийслэлийн 45 дугаар дунд сургууль 
• Их Британийн Ийст Англиа Их Сургуулийг эдийн засгийн чиглэлээр тус тус төгссөн.  

АЖИЛЛАСАН БАЙДАЛ 

• 2006-2007 онд Гацуурт Группийн Гадаад Харилцааны Захирал 
• 2007 оноос Тэрэлж зочид буудлын Ерөнхий Менежер 
• 2011 оны 2 сараас эхлэн  Монгол ТВ-ийн захирлаар ажиллаж байна.