Ашигт малтмал, газрын тосны газраас АИ-92 шатахууны үнийн талаар мэдээлэл хийж байна.

АМГТГ-ын дэд дарга Ц.Эрдэнэбаяр:

АИ-92 шатахуун зарим шатахуун түгээх газарт худалдаалагдахгүй байгаа талаар мэдээлэл өгье. Тус бензиний гол нийлүүлэгч нь ОХУ юм. Ангарскийн үйлдвэрт засвар хийж байгаагаас АИ-92 шатахууны нөөц багассан.

Манай улс газрын тосны бүтээгдэхүүний 28 хоногийн нөөцтэй байна. Шатахууны хомстол үүсээгүй. Нөөц тодорхой хэмжээгээр багассан. Шатахууны үнэ нэмэгдэх үндэслэл байхгүй.

-Шатахуун түгээгч компаниуд ашиггүй ажиллаад байгаа гэх мэдээлэл бий. Энэ талаар мэдээлэл өгөөч.

-Газрын тосны үнэ шилэн байдаг. Ам.долларын ханш, татварын үнэ ил тод байдаг. Үнэ огцом нэмэгдэх төлөв байхгүй. Гадаад зах зээлд түүхий эд өсвөл тодорхой зохицуулалтыг хийнэ. Энэ талаар тайван байж болно.

-Иргэдэд АИ-92 шатахуун олдохгүй байна. Та газар дээр нь очиж ажилласан уу?

-Бид газар дээр нь очиж ажилласан. Шунхлай компанийн 4-5 газарт бүтээгдэхүүн борлуулахгүй байсан бол өнөөдрөөс борлуулалтаа хийж байна. Нөөц дууссан зарим газрууд үйл ажиллагаагаа зогсоосон байсан. Нөөц тасалдах, тасрах гэдэг өөр ойлголт юм.