• Монголын банкны холбооноос 2023 оны эхний хагасын тоймыг танилцууллаа
• Цаг уурын нөхцөл байдлаас шалтгаалан ХАА-н салбарт эдийн засаг уналттай байна
• Банкнууд IPO амжилттай гаргаж, 447 тэрбум орчим төгрөгийг татан төвлөрүүлэв

Монголын банкны холбооноос 2023 оны эхний хагас жилийн тоймыг танилцууллаа. 2023 оны эхний хагас жилд эдийн засгийн өсөлт 6.4 хувьтай гарсан нь уул уурхайн салбарын сэргэлт хурдан байсантай холбоотой.

Тодруулбал оны эхнээс уул уурхай, түүнийг дагаад тээвэр, агуулахын салбарын сэргэлт харьцангуй хурдан байсан нь эдийн засгийн өсөлтөд эерэг нөлөө үзүүлжээ. Харин боловсруулах болон эрчим хүчний салбар сэргэж байгаа ч харьцангуй сул хэвээр байна.

Мөн цаг уурын нөхцөл байдлаас шалтгаалан Хөдөө аж ахуйн салбарт эдийн засаг уналттай байна. Засгийн газрын зүгээс үр ашиггүй зардлуудыг бууруулсан нь төлбөрийн тэнцэл дээрх дарамтыг бууруулж ханш тогтворжих нөхцөлийг бүрдүүлсэн аж.

Энэ онд банкууд хөрөнгийн зах зээл дээр хувьцаагаа гаргасан нь өөрийн хөрөнгийн хүрэлцээг нэмэгдүүлжээ. Системийн нөлөө бүхий банкууд IPO амжилттай гаргаж, 447 тэрбум орчим төгрөгийг татан төвлөрүүлэв.

Ингэснээр эдийн засгийг дэмжих, гол салбаруудын сэргэлтийг хурдасгах хангалттай хэмжээний өөрийн хөрөнгөтэй болсон байна. Банкуудын өөрийн хөрөнгийн хүрэлцээний дунджийг 12 хувиар зааж өгсөн бол манай банкуудынх 18 хувьтай гарсан байна.

Гадаадын хөрөнгө оруулагчид нийт хөрөнгийн зах зээлийн арилжаанд оролцогчдын 2-3 хувийг эзэлдэг.

Системийн нөлөө бүхий банкуудын өөрийн хөрөнгийн дүн 4.9 их наяд төгрөгт хүрч, өмнөх оны мөн үеэс 13 хувиар өссөн ч өөрийн хөрөнгөөр бий болгосон ашиг нь хадгаламжийн өгөөжөөс бага түвшинд байна. Банкуудын өөрийн хөрөнгийн өгөөж 10 хувьтай байна.

Богино хугацаанд ашиг олох сонирхолтой хөрөнгө оруулагчид их байгаа нь хувьцааны ханшийг бууруулах гол шалтгаан болж байна. Өөрөөр хэлбэл урт хугацааны хөрөнгө оруулалт хийх мэргэжлийн хөрөнгө оруулагчид ховор байгаа юм.

Банкуудын төвлөрлийг бууруулахад одоогийн хөрөнгийн зах зээлийн үнэлгээний 15 орчим хувьтай тэнцэх хөрөнгө оруулалт шаардлагатай.