• Aфрик тивийн аварга шалгаруулах тэмцээний шигшээ 16 шатны тоглолтууд үргэлжилж байна
• Экваторын Гвиней 0-1 Гвиней
• Египет 1-1 (7-8) Ардчилсан Конго

Африкийн хөл бөмбөгийн холбооноос зохиодог тивийн аварга шалгаруулах тэмцээн "Africa Cup of Nations" буюу "AFCON 2023"-ын шигшээ 16 шатны тоглолтууд үргэлжилж байна.

Өнгөрсөн шөнийн эхний тоглолт "А" хэсгийн тэргүүн баг Экваторын Гвиней "С" хэсгийн 3-р байр Гвинейн шигшээ багийн хооронд болов. Хэсэгтээ Нигери, Кот д'Ивуар зэрэг хүчирхэг багуудын эсрэг хожигдоогүй Экваторын Гвинейгээс 55 дахь минутад Федерико Бикоро улаан хуудсаар торгуулж талбайгаас хөөгдсөн. Улмаар хүн дутуу багийн эсрэг тоглосон Гвинейгээс Мохамед Баяо 90+8 дахь минутад гоол оруулснаар 0-1 харьцаагаар Гвиней хожиж шөвгийн наймд шалгарав.

• AFCON: Супер бүргэдүүд Камеруныг хожиж шөвгийн наймд шалгарлаа
• AFCON: Тунис тэмцээнээс хасагдаж Намиби цааш шалгарав
• AFCON: Алжирын шигшээ баг Африкийн цомоос хасагдлаа

Харин нөгөө талд "B" хэсгийн дэд байр Египет, "F" хэсгийн дэд байр Ардчилсан Конготой тоглосон. Эхний гоолыг Конгоос Мешчак Элиа 37 дахь минутад оруулсан бол Египетийн Мостафа Мохамед 45+1 дэх минутад торгуулийн цохилтоор харьцааг тэнцүүлсэн.

Үндсэн цаг ийнхүү 1-1 харьцаагаар тэнцэж нэмэлт цаг сунгахад 97 дах минутад Египетийн Мохамед Хамди Шараф улаан хуудсаар торгуулж хөөгдөв. Гэвч нэмэлт цагт ч гоол орсонгүй. Ийнхүү торгуулийн цохилт болоход 7-8 харьцаагаар Конгочууд шөвгийн наймд шалгарлаа. Тэд дараагийн шатанд Гвинейтэй тоглоно.

Сонирхуулахад, Африкийн цомын шигшээ 16 шатны эхний дөрвөн тоглолтод нийт дөрвөн улаан хуудас өргөгдсөн байна. Шигшээ 16 шатны эхний өдөр болсон Ангол, Намибийн шигшээ багуудын тоглолтоос 2 тоглогч улаан хуудсаар торгуулсан юм.

Одоогоор Экваторын Гвиней улсын шигшээ багийн довтлогч Эмилио Нсүэ 5 гоолтой мэргэн буучдын жагсаалтыг тэргүүлж байгаа бол Анголын шигшээ багийн довтлогч Желсон Дала, Египетийн Мостафа Мохамед нар 4 гоолтой удаалж байна.