Зургаадугаар сарын 23-д эхлэх "Улаанбаатар 2023" жүдо бөхийн их дуулгын оноолт тодруулах хэвлэлийн бага хурал өнөөдөр /2023.06.22/ боллоо.

Энэ үеэр Олон улсын жүдо бөхийн холбоо буюу IJF-ын Ерөнхий нарийн бичгийн дарга Лиза Алланаас монголын жүдо бөхийн хөгжлийн талаар тодруулав.

Тэрээр энэ оны тавдугаар сард IJF-ын Ерөнхий нарийн бичгийн даргаар сонгогдсоноор тус албыг хашиж буй анхны эмэгтэй, мөн Британийн иргэн болсон юм.

-Таны хувьд Монголд цөөнгүй удаа ирж олон улсын түвшний тэмцээн зохион байгуулсан туршлагатай. Монгол оронд тэмцээн зохион байгуулах нь бусад орнуудад зохион байгуулахаас ямар ялгаатай вэ? Манай орны онцлог юу вэ?
-Улс бүрт тэмцээн зохион байгуулахад харилцан адилгүй. Учир нь тэдний ажиллах арга барил, соёл, стандарт, үнэ цэн өөр. Монголчуудын хувьд жүдогийн өргөн мэдлэгтэй нь тэмцээн зохион байгуулж буй бидэнд маш их ач холбогдолтой.

• Жүдо бөхийн "Улаанбаатарын их дуулга" тэмцээний талаар мэдээлж байна
• Улаанбаатарын их дуулгад Монголын 54 жүдоч зодоглоно
• Улаанбаатар их дуулга 2022: Монголчууд Улаанбаатар их дуулгаас 11 медаль хүртэв

Тэдэнд жүдотой холбогдох уламжлал, гайхалтай түүх байдгаас гадна олон удаагийн Гран-При тэмцээн зохиож байсан туршлага бий. Үзэгчид жүдогийн талаар мэддэг байх нь маш том давуу тал болж тэмцээний уур амьсгалыг бүрдүүлж өгдөг.

-Монголдоо хамгийн алдартай спортуудын нэг нь жүдо. Манай улсын жүдо бөхийн хөгжлийн талаар та юу хэлэх вэ?
-Энэ спорт Монголд хурдацтай хөгжиж байна. Жүдод хайртай үзэгчид, тамирчдынх нь гаргаж буй амжилтаас жүдо бөхийн хөгжлийг харж болно.

-Монгол улсад жүдо бөхийн дэлхийн аварга шалгаруулах тэмцээнийг зохион байгуулах боломжтой юу?
-Мэдээж боломж бий. Зөвхөн насанд хүрэгчдийн дэлхийн аварга шалгаруулах тэмцээнээр хязгаарлагдахгүйгээр ирээдүйд залуучууд, өсвөрийн болон ахмадуудын дэлхийн аварга шалгаруулах тэмцээнийг зохиох боломж бий.