Трампын засаг захиргаа 75 улсын иргэдэд АНУ-ын цагаачлалын виз олгохыг тодорхойгүй хугацаагаар зогсоох шийдвэр гаргажээ. 

АНУ-ын Төрийн департамент энэ шийдвэрээ "Нийгмийн халамж, тэтгэмжийг ашиглан Америкийн ард түмний хөрөнгийг завших гэсэн иргэдийг зогсоох зорилготой" хэмээн тайлбарласан. 

АНУ цагаачлахаар ирсэн хүмүүсийг америкчуудын хөрөнгө, баялгийг завшихгүй гэдгийг тодорхой болгож чадахаас нааш цагаачлалын визийг олгохгүй хэвээр байх аж.

Уг шийдвэр нь нэгдүгээр сарын 21-нээс хэрэгжинэ гэсэн ч ямар 75 улс гэдгийг одоогоор нийтэд танилцуулаагүй байна. 

Гэхдээ Fox News уг жагсаалтын эхийг олж харсан хэмээн мэдээлсэн бөгөөд жагсаалтад багтсан улсуудын дунд Монгол Улс байгаа гэсэн мэдээлэл байна.

Дональд Трамп ерөнхийлөгчийн албанд очсоноосоо хойш хууль бус болон хууль ёсны нэвтрэлтийг аль алиныг нь хязгаарлах бодлого баримталж буй.

Түүний засаг захиргаа Бразил, Иран, ОХУ, Сомали улсын иргэдэд цагаачлалын виз олгох үйл явцыг аль хэдийнэ зогсоогоод байна. 

Трамп ерөнхийлөгч болсноосоо хойш 100 мянга гаруй визийг хүчингүй болгосон гэх мэдээлэл бий. 

Мөн АНУ-аас 605 мянга гаруй хүнийг албадан гаргасан бол 2.5 сая иргэн сайн дураараа АНУ-ыг орхисон гэж Дотоодын аюулгүй байдлын яамнаас мэдээлжээ. 

Эх сурвалж: The Guardian