Дорнод аймгийн Матад суманд үйл ажиллагаа явуулдаг БНХАУ-ын хөрөнгө оруулалттай “Петрочайна дачин тамсаг” компанийн үйл ажиллагаатай холбоотой маргаан, шүүхийн хууль бус шийдвэрийн талаар “Нутгаа аврах Чойбалсанчуудын нэгдэл” ТББ өнөөдөр мэдээлэл хийлээ.

ТББ-ын төлөөллүүдийн мэдээлснээр, тэд дөрвөн жил компанийн байгаль орчны эсрэг  үйл ажиллагаатай тэмцэж байгаа ч цагдаа, шүүхийн байгууллагууд эсрэг талд үйлчилж байна гэлээ. 

Тухайлбал, Матад сумын 19-р талбайд малчдын ундны усыг цоожилж, цагийн хуваарийн дагуу олгож байсан явдлыг чөлөөлөхийг шаардаж бичлэг хийсний төлөө Эрүүгийн хариуцлага хүлээлгэхээр прокуророос ял төлөвлөсөн гэв.

“Петрочайна дачин тамсаг” компани үйл ажиллагаа хууль зөрчиж удаа дараагийн байгаль орчны эсрэг үйл ажиллагаа явуулсан. Үүнд 2017 оны Засгийн газрын тогтоол өнөөдрийг хүртэл компанид хэрэгжихгүй байгаа бөгөөд Геодези зураг зүйн газраас олгосон албан бичгээр, нэг сая га газар улсын тусгай хэрэгцээнд авсан ч ашиглах журам нь хангагдаагүй байна. Дорнод аймгийн засаг дарга, Уул уурхай, Газар зохион байгуулалтын газар хамтран гуравласан гэрээ байгуулаагүй тул газрыг хэрхэн ашиглах талаар зохицуулалтгүй байхгүй.

2024 оны нэгдүгээр сарын 5-нд ЗГХЭГ-ын архив, нууц албан хэрэг хөтлөлтийн газраас авсан баримтаар, Тамсгийн сав газарт олборлолт хийж байгаа “Петрочайна дачин тамсаг” компанийн толгой компани болох Дачин Ойл Пилттай бүтээгдэхүүн олборлох гэрээ байгуулсан ч албан ёсоор эрх, үүрэг нь шилжээгүй болох нь батлагдсан байна.

Мөн стратегийн орд бүтээгдэхүүнийг тээвэрлэхэд Засгийн газар тогтоол батлаагүй, УИХ мэдээгүй нөхцөлд үйл ажиллагаа явагдаж байгаа нь Үндсэн хууль болон хууль тогтоомжийг зөрчсөн гэж ТББ үзэж, Үндсэн хуулийн цэцэд хандсан боловч дүгнэлт гаргаагүй.

Мөн Газрын гүн рүү химийн бодис хаяж, мал амьтан, хүний эрүүл мэндэд хор хохирол учруулж буй тус компанид хууль шүүхийн байгууллагаас хариуцлага тооцохгүй байгаад Засгийн газар анхаарах хэрэгтэй гэв.