Шадар сайд бөгөөд Эрчим хүчний үндэсний хорооны дарга Т.Доржханд тэргүүтэй төлөөлөгчид энэ оны 10 дугаар сарын 20-22-нд Британи Улсад айлчилжээ.

Айлчлалаар Британийн эрчим хүч, дэд бүтэц, банк санхүүгийн салбарт ажиллаж буй томоохон компаниудын төлөөллүүдэд эрчим хүчний шинэчлэлийн талаар танилцуулсан байна.

Шадар сайд Т.Доржханд Британийн Гадаад хэрэг, хамтын нөхөрлөл, хөгжлийн яамны Энэтхэг-Номхон далайн сайд Сийма Малхотра тэргүүт холбогдох газрын төлөөллүүдтэй уулзжээ.

Уулзалтын үеэр Монгол Улс уул уурхайн түүхий эдийн экспортод түшиглэсэн хүрэн эдийн засгаас сэргээгдэх эрчим хүчинд тулгуурласан ногоон эдийн засаг руу шилжиж, улмаар ирээдүйд эрчим хүч экспортлогч улс болох зорилт тавин ажиллаж буйг дурдаж, Британийн төр, хувийн хэвшилтэй хамтран ажиллахад бэлэн байгаагаа илэрхийлэв.