Эрүүл мэндийн сайд Ж.Чинбүрэн өнөөдөр Нийслэлийн түргэн тусламжийн төвд ажиллажээ. Эрүүл мэндийн салбарт нэн тэргүүнд хэрэгжүүлэх томоохон бодлогын хүрээнд түргэн тусламжийн хүртээмж, чадамжийг сайжруулах ажил багтаж байна.

Түргэн тусламж түргэн хүрч, чадварлаг үйлчилдэг байх нөхцөл, боломж, системийг улс орон даяар бүрдүүлж, бэхжүүлж чадвал аварч болох амийг аврах эрүүл мэндийн салбарын хамгийн том ажил, бодлого байх болно гэдгийг Эрүүл мэндийн сайд Ж.Чинбүрэн онцлов.

Нийслэлийн түргэн тусламжийн төв байгуулагдаад 95 жил болж буй бөгөөд Эрүүл мэндийн сайд анх удаа ажиллаж байгаад талархаж буйгаа байгууллагын ажилчид илэрхийллээ.

Нийслэлийн түргэн тусламжийн төв 175 эмч, 125 жолооч бусад ажилчдын бүрэлдэхүүнтэйгээр ажилладаг байна. Нийслэлийн түргэн тусламжийн төв нь:

• 2021 онд 326.254
• 2025 оны эхний 11 сарын байдлаар 404.485 дуудлага хүлээн авчээ. Сүүлийн жилүүдэд дуудлагын тоо тогтмол өсөж байгаа ба тэр дундаа хүүхдийн дуудлага 10-30 хувиар өсжээ.

Өнгөрсөн 11-р сард тохиосон томуугийн оргил үед түүхэндээ хамгийн их дуудлагыг хүлээн авсан байна. 2025 оны 11 дүгээр сарын 24-ний өдөр 2787 дуудлага хүлээж авч үйлчилсэн нь түүхэндээ хамгийн өндөр ачаалал авсан өдөр хэдий  ч иргэдээс гомдол ирээгүй байна.

Нийслэлийн эрүүл мэндийн байгууллагад ирдэг нийт талархлын 80 хувь нь Нийслэлийн түргэн тусламжийн төвд ирдэг байна.

Эрүүл мэндийн салбарын маш хүнд ачааг үүрч минут секунд тутамд амь нас, эрүүл мэндийг авран хамгаалж байдаг түргэн тусламжийн эмч, жолооч баг хамт олондоо маш их баярлалаа гэдгийг Эрүүл мэндийн сайд Ж.Чинбүрэн иргэдийнхээ өмнөөс уламжлав. 



Эх сурвалж: ЭМЯ